A principios dos anos 60 había varios salóns en Ordes que abrían os domingos
e días festivos. Por tanto tamén había necesidade de orquestras para actuar
neles. Con esta favorable coxuntura varios mozos de Ordes xuntáronse e formaron
a Orquesta
Cantábrica. A icónica foto que ilustra este artigo foi tomada por
Riveira no Salón de Encarnación Meijide, viúva de Ramón Prado. Nese lugar
tocaron moitas veces ao igual que nos outros salóns.
Os seus 10 compoñentes eran: Martís, Cándido
Fernández Rey Camel, dous Regos, Manuel
Martínez del Río o Corveiro, Manuel Ríos
Rodríguez (alcumado Buxán por ser de Val do
Dubra), Manolo Recouso, Francisco Moure Paco de
Xaquín e Juan e José Manuel Mosquera Franqueira, coñecidos como Juan e Manolo de Isolina*, que eran irmáns de Angelito das Correas*.
Non durou demasiado tempo. No ano 1964
desapareceu, pero catro dos seus compoñentes (Martís, Camel, o Corveiro e
Manolo de Isolina) continuaron co nome de Los Cantábricos durante un tempo. O seu teléfono de contratación (Nº 46) era o do Túnel.
DESFILE DE
ESTRELLAS
Foi un popular concurso radiofónico que houbo
dos anos 50 aos 70 en varias emisoras de España. Na Coruña o escenario era o
Teatro Rosalía Castro. Conforme as rondas ían avanzando a expectación medraba e
o teatro estaba cheo a rebordar nas semifinais e sobre todo nas finais. Presentaban os moi poulares Marina de la Peña e
Emilio Díaz.
Ordes quedou paralizado con todas as orellas
pegadas aos transistores cando Manolo de Isolina, o vocalista da Orquestra
Cantábrica, participou no concurso. Non foi o único, pois tamén o fixeron Santiago
Naveira, un albanel que viñera de Betanzos a Ordes para facer os
lavadoiros do Recreo e que aquí casara cunha filla de Rey -un chófer do
Cotovío-, e Esperanza
Veiras Penedo, unha moza de Queis (Montaos).
Cos anos Manolo de Isolina converteuse no
"home para todo" do alcalde Martino. Andaba co coche de propaganda,
organizaba festas (normalmente levaba o peso da do Champiñón) e, como non, recordando o seu paso por "Desfile de Estrellas", tamén
organizou un "Festival da Canción" en Ordes.
|
* Isolina Mosquera Franqueira foi unha muller
que viviu en Vilar e que tamén cantaba moi ben. Tivo varios fillos de
solteira (Julio, Esperanza, Milagros, Ángel, Juan, José Manuel e Jaime). De
todos eles o máis coñecido foi Ángel.
Ángel
Mosquera Franqueira (1939-2024) alcumado Angelito das Correas tiña un
ultramarinos no Recreo 65 e tamén vendía nas feiras, onde destacaba pola súa
voz estridente. Estaba casado con María Valiño Martínez coa que tivo dous
fillos: Ángel Ramón e Antonio.
|
