Castro das Medorras (Lesta)

  Se ben o castro de Reboredo -na actualidade case totalmente destruído- está practicamente no límite parroquial e municipal, a realidade é que pertence a Gorgullos. Por tanto a parroquia de Lesta conta cun único castro no seu territorio, denominado o castro das Medorras.

  Unha vez máis podemos constatar o continuísmo da poboación desde a prehistoria. Cando os romanos chegaron e obrigaron aos nativos a deixar os castros, estes non se alonxaron moito. Velaquí o motivo de que tantos castros estean a pouca distancia dunha igrexa. En Lesta sucede exactamente iso: o castro localízase a uns escasos 180 metros (en liña recta) ao nordés da igrexa de Santo André.

 

 

  É un recinto case perfectamente circular, defendido por un considerable terraplén na zona sur e parapeto nos sectores norte, leste e sueste. Mide uns 90-100 metros de leste a oeste e un chisco máis de norte a sur. A súa superficie supera os 6.600 metros cadrados -máis de 10 ferrados-.

  Contrariamente a outros castros da comarca é de moi fácil acceso. Basta achegarse pola estrada ata o lugar da Cruz, onde estaba o bar do mesmo nome hoxe pechado. Alí, fronte do bar, parte un camiño -logo convertido en carreiro- que vai directamente ata a entrada do castro. Este está cercado por unha liña de arboredo pero o seu interior na actualidade está destinado a labores agrícolas, así que permanece completamente limpo en verán despois de ser recollida a colleita.