En 1960, co recente triunfo
de Fidel Castro en Cuba, recruouse a Guerra Fría. A URSS abatiu un avión espía,
atrapando ao piloto Francis Gary Powers e Nikita Kruschev pegou co zapato na tribuna nunha asemblea da
ONU. Os USA pola súa parte botaron o Enterprise, o
primeiro portaavións nuclear, e contemplaron en novembro a victoria de John F. Kennedy
sobre Richard Nixon despois dun trascendental debate
televisado. Brasil estreaba nova e futurista capital no mes de abril. Pouco
despois en Chile produciuse o terremoto máis poderoso da
historia (9,5 Ritcher) con máis de 2.000 mortos.
Francia, logo da humillación en Indochina e Suez, detonaba a súa 1ª
bomba atómica de proba e enfrontaba a descolonización en Africa: Togo,
Madagascar, Costa de Marfil, Chad, Congo, Gabón e Mauritania independizáronse
ese ano. Tamén o Congo Belga alcanzou a independencia en xuño. En cambio a
República Sudafricana viviu a terrible masacre de Sharpeville. En Sri Lanka
chegaría á presidencia a primeira muller, Sirimavo Bandaranaike.
Foi un ano de grandes avances na ciencia: en
xaneiro Jacques Picard e Don Walsh a bordo do batíscafo Trieste baixaron á
fosa de las Marianas, en febreiro inaugurouse o maior acelerador de partículas
en Suiza, en abril iniciouse o programa SETI e en maio tivo lugar un
feito revolucionario coa venda da 1ª píldora anticonceptiva.
Noticias rechamantes foron o secuestro en
Arxentina do criminal de guerra Adolf Eichmann por parte de axentes do Mosad, a voda
de Balduino de Bélxica con Fabiola de Mora y Aragón e os Xogos Olímpicos de Roma onde destacou Abebe Bikila.
1960 foi ano de películas memorables como The Apartment
ou Psycho
e dunha canción e baile que o petou totalmente: o Twist.
Nunha España que chegou aos 30,5 millóns de habitantes 1960 foi un ano duro por ser o primeiro
despois do Plan de Estabilización, pero pronto se verían os resultados. Cunha
RPC de 1.042 $ era xunto con Portugal o país máis pobre de Europa occidental. A
poboación agraria aínda era o 39% do total e supoñía o 22% do PIB, pero había
signos moi positivos, sobre todo os 6
millóns de turistas que viñan ao país e deixaban divisas e novas ideas.
No eido da cultura a voda de Fabiola e
Balduino disparou a venda de televisores pero a radio seguía sendo a raíña. No
cine iniciou o fenómeno Marisol con "Un rayo de luz" aínda que houbo outras películas de
maior calidade como "El cochecito" ou "Los golfos". Na música comezou a revolución que desprazaría á
copla e ao bolero: o Dúo Dinámico
publicou a canción
"Quince años" que
sería un enorme éxito en 1961, iniciando o fenómeno fans, e Manolo Escobar renovou
a rumba co tema
"El porompompero".
Galicia tiña en 1960 a mesma poboación que Madrid!, 2,6 millóns de habitantes (o 8,5% do
total español). Continuaba forte a emigración, que agora ía tamén a Europa,
pero seguía mellorando a economía, por exemplo os irmáns Fernández López fundaron en Vigo Pescanova. Outra agradable
nova foi o Balón de Ouro logrado polo futbolista coruñés Luis Suárez.
XANEIRO: Morreu Gabriel
Amor Candal o Churrero o día 10 aos 68 anos. Debutou en Madrid o
bailarín ordense Juanjo Linares como "Xuanxo".
FEBREIRO: O día 5 faleceu
Juan López Dapena, sacerdote capelán do sanatorio da Choupana, soterrado en
Leira e o día 8 Antonio Juncal Gende aos 58 anos en Beán.
MARZO: Bautizo en Ordes
de Manuel José Pedreira, primoxénito do veterinario de Monfero Manuel Pedreira
Vázquez e Ana Mª del Río Sánchez. Voda
de Ofelia del Amo Pol con José J.L. Franco García. O día 3 morreu Manuel
Sanjurjo Sanjurjo aos 51 anos en Vilamaior, e o 16 Pilar Varela Abella aos 85 anos en Poulo. Tamén
apareceu un home aforcado en Fafián, Trasmonte (Oroso).
ABRIL: O Gobernador
Civil Evaristo Martín Freire visitou Ordes e outras vilas divulgando o "Plan Coruña".
MAIO: Inauguración da
estación de servizo Macoga na rúa
Alfonso Senra. Xuízo contra o veciño de Rodís Manuel Bello González pola morte
de Gregorio Pereiro Liste. Voda de Mª
Pilar Cristín Pérez con Alfonso Castro Pol. O día 12 faleceu Manuel
Rodríguez aos 58 anos en Leira. O día 18 naceu Pedro Hervés Álvarez (Brea
Hervés).
XUÑO: Asemblea
comarcal sacerdotal en Ordes clausurada polo cardeal Quiroga Palacios. O día 14
morreu o mestre e tenente de alcalde Ricardo Rama Blanco. O día 24 aos 59 anos
Manuela Martínez Varela, muller de Juan Ríos García e nai de 7 fillas e un
fillo. O concello de Buján pasa a chamarse oficialmente Valle del Dubra.
XULLO: Nun grave
accidente de moto entre Ordes e Oroso morreu o tenente de Artillería de 45 anos
Francisco Cuba Miguel. Outro grave accidente de moto en Viaño Pequeno tivo de
protagonista ao xastre de Ordes José Lodeiro Sánchez de 34 anos e deixaríalle
secuelas permanentes. O gobernador Civil inaugurou o
matadoiro de Ordes.
AGOSTO: Voda de Mª Jesús
Liñares Stolle co médico Leandro Rodríguez Buján. Festas de Ordes con
iluminación do padronés Eliseo Blanco Rial.
SETEMBRO: Voda de
Pilarín García Yrago con Luis Astray. Bautizo da primoxénita do xuíz Alfonso de
Navascués y Pablos e Mª Erundina Pérez de Quiñones. O día 6 morreu a moi coñecida
Josefa
Vázquez Aude a Tarula.
OUTUBRO: Parou a comer en
Ordes o equipo do Celta de visita en Riazor. O día 28 morreu aos 87 anos Manuela
Vilariño Fernández, viúva de Faya.
O día seguinte morreu Francisca López Camino aos 26 anos.
NOVEMBRO: O día 21
morreu Juan Martínez del Río de Vilaverde, marido de María Manteiga.
DECEMBRO: Derrota do Ordes
diante do Ferrol. A Sociedade Cultural organizou unha festa de fin de ano no
Oriental Cinema amenizada pola orquestra Copacabana. O día 30 naceu José
González Marcos PJ.
