Castro do Piñeiro (Mercurín)

   Na parroquia de Mercurín, ademais do castro de Souto, o máis próximo á igrexa, e doutro que está preto do Vilar, achamos na zona sueste, case no límite parroquial con Leira o castro do Piñeiro.

 

  Tamén é coñecido como castro da Portela (está a pouco máis de 200 metros dalgunha das casas deste lugar) ou simplemente a Medorra.

  Contra o que é usual noutros castros, non está nunha zona especialmente alta e ten moi fácil acceso, pois na estrada Ordes-Cerceda á altura da Portela hai unha pista asfaltada que conduce ao Piñeiro e que bordea o castro. Nesta pista, na súa zona sur está a entrada.

 

  É un recinto vagamente circular que conserva o parapeto no sector norte-noroeste, mentres no resto do perímetro apenas quedan restos do mesmo. No sector norte apréciase o foso, en correspondencia co parapeto. As súas dimensións son sobre 120 metros de norte a sur e uns 105-110 de oeste a leste, tendo unha superficie bastante grande: aproximadamente 1,1 Hectárea (ou máis enxebre, uns 17 ferrados).

  Na actualidade está rodeado de arboredo e o interior, dividido ao parecer en catro parcelas con orientación norte-sur, dedícase a prados e a algún cultivo (incluíndo árbores froiteiras).