Brincadeira

  Dentro da política de grandes eventos e custosas obras que iniciou durante o seu primeiro mandato o alcalde Manuel Regos Boquete, líder de UxO, tivo un lugar destacado o festival Brincadeira.

 

FESTIVAL BRINCADEIRA en ORDES
2007	Lamatumbá, Terrakota, Samesugas, Kastomä.
2008	Amparanoia, Che Sudaka, Obrint Pas, Machina. Krakovia, Def con dos, Los Coronas, Chícharo psicótico.
2009	La Pulquería, Che Sudaka, Dios ke te krew, Las Furias. Boney M, Rumba Tarumba, Chico Trujillo, Kastomä, Virüs.
2010	Siniestro Total, Sex Museum, Gualitxo, Chícharo psicótico. Orquesta Mondragón, Los Reyes del KO, Los Chavales, A Cona ye-yé, Chimo Bayo.
2011	Europe, Genitorturers, Rosendo, El Vez, The Grit, Burning ...

 

  Organizado pola firma Iceberg Audiovisual o primeiro Brincadeira en Ordes foi o sábado 25 de agosto de 2007 para aproveitar o tirón da Movida. A intención era crear un espectáculo gratuíto que tivera continuidade en Ordes e que se convertese nunha das principais referencias do panorama musical galego.

  As actuacións dos grupos foron presentadas por Mofa e Befa na zona do campo de fútbol e ademais houbo unha mostra de artesanía  e exhibicións de graffitis nunha carpa.

 

  O ano 2008 o festival xa durou dous días (venres 8 e sábado 9 de agosto) sendo os concertos no campo da feira. O grupo máis popular era o madrileño Amparanoia na súa xira de despedida antes de que Amparo Sánchez voase pola súa conta. Felipe González, responsable de Iceberg Audiovisuais, promocionaba o evento dicindo que «é un festival a nivel nacional con grupos moi importantes para un concerto de entrada gratuíta». As actividades paralelas foron un festival de videoclips, un concurso de arte na rúa, outro do videoxogo da Play Station Guitar Hero e unha exposición de grafitis, tatuaxes, deseño e moda. Habilitouse para acampar a zona do centro de saúde. O éxito foi considerable e Ordes quedou literalmente tomado ao asalto polos 7.000 asistentes diarios.

 

  O ano 2009 (no que viña de ter lugar a descomunal Gala Panorama contra o Cancro) celebrouse  os días venres 7 e sábado 8 de agosto. O venres uns 10.000 mozos acudiron a ver principalmente ao grupo valenciano La Pulquería. Pero o prato forte era o sábado a denominada «superfesta hortera» onde se invitaba ao público a acudir disfrazado para bailar ao ritmo do vello grupo Boney M. Volveu a haber carpa con capacidade para 15.000 persoas e lugar para acampar e, entre as actividades paralelas, un certame de arte urbana, unha mostra de novas tendencias e un concurso de fotografía. O éxito foi total e entre os dous días calculouse unha afluencia de 25.000 persoas.

 

  O ano 2010 Brincadeira empezou o venres 6 agosto con 10.000 persoas escoitando o último disco de Siniestro Total. A festa hortera do sábado 7 onde o público foi disfrazado para intentar gañar un premio contaba coa Orquesta Mondragón, a mítica banda capitaneada por Javier Gurruchaga, presentando o seu último disco "El Maquinista de la General". Pero tamén estaban outros grupos e como broche final o indescritible Chimo Bayo. Novamente unhas 25.000 persoas asistiron ao evento.

 

 

  O ano 2011 o festival botou a casa pola fiestra e durou tres días, desde o xoves 11 ao sábado 13 de agosto, con tres escenarios para albergar aos case 40 grupos que xirarían como satélites diante do cegador brillo de Europe na súa primeira actuación en Galicia, presentando o seu último disco "Last Look at Even". Tamén houbo disc jockeys e diferentes concursos. Pero nesta ocasión o evento deixou de ser gratis: había que pagar 25 € polos tres días.

  Naquel momento Brincadeira estaba catalogado como un dos 18 festivais máis importantes de España.

  Hoxe é inevitable recordar con nostalxia aquela xornada do 13 de agosto de 2011 cando despois de medianoite aparecía a melena dourada de Joey Tempest berrando «Boas noites, Galicia» diante dun público entregado e dunha boneca inchable que percorría os ombreiros das primeiras filas. Ninguén o sabía pero aquela especie de Woodstock galego que desafiaba aos tempos de crise estaba dando o seu último alento.

 

  O concello viu que non saían as contas. Nesa edición perderon preto de 200.000 euros e, a pesar da propaganda que xeraba para Ordes, non podía asumir tanto gasto. No ano 2012 Felipe González e Julio Negueruela de Iceberg Audiovisual levaron o festival a Cambre. Alí as cousas tampouco foron ben e o concello perdeu uns 100.000 euros, así que os empresarios decidiron volver a Ordes no ano 2013.

  Esta vez o festival tería lugar na antiga estación da Pontraga na Parroquia de Parada do 9 ao 11 de agosto. Alí tiñan pensado crear unha "vila pantasma" que durante tres día acollería 40 grupos en tres escenarios coa xente disfrazada como se fose Halloween. As entradas vendíanse a 15 € e estimaban contar con 5.000 asistentes diarios, pero... as previsións non se cumpriron e só 4 días antes o festival foi cancelado, deixando, iso si, un bonito cartel publicitario de recordo.