Capela da Mercé de Poulo

  A súa situación na Calle de Poulo ao pé do Camiño Inglés permite supoñerlle unha orixe medieval, pero sufriu tantas modificacións que agora nun primeiro momento ata poderíamos confundila cunha igrexa do sur de España ou Portugal polo seu aspecto exterior. 

 

 

  Ten planta rectangular cunha ábsida algo máis estreita á que está acaroada pola parte norte a sancristía, o que lle da unha forma de L común a outras igrexas da zona como as de Buscás, Ardemil e Parada. A pesar da súa condición de capela, é moi grande. Os seus 20 metros de lonxitude por case 7 de anchura, máis o engadido da sancristía fan que ocupe un 165 metros cadrados, superando en tamaño á maioría das igrexas do concello, e obviamente á do Outeiro (que é das máis pequenas).

  Está feita de cachotería revocada, agas as esquinas e marcos de portas e ventás onde se empregaron perpiaños. O tellado a dúas augas está cuberto con tella do país. A espadana e unha escaleira ata ela son de formigón, froito dunha reforma a principios do século XX. No ano 2021 volveuse a reformar, cambiando a forma da baranda.

 

  Na fachada hai unha placa en recordo do sacerdote don Manuel Otero Rodríguez e na esquina do muro norte coa sancristía hai outra de mármore na honra dos fregueses caídos "por Dios y por España" na Guerra Civil: José Suárez, Manuel Veiras, Jesús Gómez, Manuel Rodríguez, Benito Botana e Ricardo Pulleiro.

 

 

  O interior sufriu numerosos engadidos. Así e todo consérvase o piso de lousas orixinais. Hai notables pezas de carpintería e dous retablos laterais neoclásicos enfrontados. Un arco de medio punto, tamén moi reformado, da acceso ao presbiterio onde destaca un retablo maior neóclasico da segunda metade do século XIX, pero con tal profusión de adornos e dourados que máis parece rococó. Na súa parte alta hai tres imaxes de pequeno tamaño. A imaxe central é unha Virxe do Rosario flanqueada ao norte por San Sebastián e o Papa San Silvestre e ao sur por San Bieito e San Xian, o patrón da parroquia.

  Por suposto nun lugar destacado a carón do muro sur da nave está a imaxe da Virxe da Mercé. Ténselle moita devoción na zona e na súa honra celébrase unha concorrida romaría o día 24 de setembro.

  Para coñecer outros templos do concello preme en Igrexas e capelas de Ordes.