Vodas en 1952

  No ano 1952 Ordes, e máis particularmente a familia Astray, viviu un par de vodas de avoengo.

 

  A primeira tivo lugar a principios de xullo. O avogado Manuel Astray Rivas, entón un mozo de 28 anos, casaba con Mª Ángeles Mariño Iglesias doutra importante familia da vila, os Mariños dos Lagartos.

  A noiva, que todos coñecían como Marujita, levaba un elegante traxe "de raso duquesa" e entrou na igrexa parroquial do brazo do seu irmán Francisco Mariño Iglesias. O noivo, de rigorosa etiqueta, fixo a súa aparición acompañado da súa nai Clara Rivas Marzoa. Portaban as arras os "encantadores" nenos Mª Jesús Pomar Liñares e Miguel Ángel Mariño San Juan. Bendiciu a unión o párroco don Joaquín Andrade que dirixiu unha "sentida plática" aos contraentes. Durante a misa púidose escoitar o "Ave María" de Gounod. Representou á lei o avogado Manuel Astray Mato, pai do noivo. Asinaron por parte da noiva José Pérez Riesco, Felipe Solórzano Rodríguez, Jose Insua Insua e os seus irmáns Manuel, Rafael, Ángel e José Mariño. Por parte do noivo asinaron Plácido Peña Mariño, Ramón Ríos Silva, José Lado París, Óscar Fernández Refojo, Fernando Concheiro García e o seu irmán Antonio Astray.

  Terminada a cerimonia houbo unha "espléndida" merenda fría e festa e baile ata medianoite. Os noivos fixeron a súa viaxe de vodas a varias capitais españolas.

  O matrimonio instalaríase en Ordes e tería dous fillos: Ángeles e Manuel. Duraría ata o ano 1994 en que morreu Manuel Astray. Marujita morrería 22 anos máis tarde en 2016. Ambos os dous están soterrados no cemiterio do Piñeiro nos panteóns das súas respectivas familias.

 

  Poucos días despois, o venres 18 de xullo, a que pasou pola vigairía foi a irmá de Manuel, Mª del Carmen Clara Astray Rivas. Demasiado adiantada para aqueles tempos polas súas actitudes liberais que incluían estar licenciada en Dereito, era coñecida na vila como Clarita a Cabra. O noivo era Bartolomé Siquier Serra, un médico balear.

 

  Baixo os acordes da Marcha nupcial Clarita fixo a súa entrada na igrexa ataviada con traxe de encaixe de Chantilly e tul ilusión, que "realzaba a súa beleza" acompañada polo seu pai Manuel Astray Mato. O noivo, de rigorosa etiqueta, ía acompañado por Clara Rivas en representación da súa nai Francisca Mascaró de Siquier. A portadora das arras era a "encantadora" nena Maruchi Ponte Rivas, filla do guerrilleiro Manuel Ponte.

 

  Nesta ocasión o sacerdote que oficiou a cerimonia foi o reverendo doutor Paulino Pedret Casado, catedrático de Dereito Canónico e decano da Facultade de Dereito da USC, que na súa homilía ensalzou as virtudes do matrimonio.

  Representou á lei o presidente da Audiencia da Coruña Cándido Conde Pumpido. Por parte da noiva asinaron como testemuñas o rexistrador da propiedade Manuel Conde Pumpido, o notario Alfonso Leirós Fernández, o tamén rexistrador da propiedade de Ordes Pedro Trepat Fadró, o avogado Emilio Astray Lozano, o xuíz comarcal Bartolomé Pericas, o avogado e alcalde de Ordes Juan Liñares Castro e o seu irmán Manuel Astray Rivas, que xa volvera da súa lúa de mel. Por parte do noivo asinaron o seu pai Bartolome Siquier Crespi, o catedrático de obstetricía e xinecoloxía na USC Alejandro Novo González, o profesor da mesma doutor Santos Sanz y Sánchez, o forense e ex-alcalde Antonio Concheiro Iglesias, o tocólogo municipal de Vilalba Zoilo López Ron e o tocoxinecólogo de Betanzos Alfonso Pando.

  Houbo logo un coktail-cea onde os invitados celebraron a unión. O novo matrimonio, despois dunha viaxe por capitales españolas e francesas, instalouse en Palma de Mallorca. Terían unha filla, Clara Siquier Astray, que seguiu os pasos da súa nai e tamén é avogada.