Festas patronais de 1951

  As festas patronais de 1951 foron un punto e aparte. A pesar da dureza da época os ordenses botaron a casa pola fiestra e a celebración durou nin máis nin menos que 6 días!

 

  Pero ademais, aínda que moitos outros anos apareceran novas na prensa, este foi o primeiro ano no que un xornal lles dedicou varias páxinas. Ese xornal foi o vespertino santiagués La Noche, que o día 14 publicou un saúdo do alcalde, o programa, unha pequena descrición do lugar, moitos anuncios, e finalmente unha entrevista co alcalde Juan Liñares onde este falaba das melloras que se estaban realizando na vila (a Casa do Concello -aínda en obras- o comezo da rúa República Arxentina, o arranxo da iglesia, un lavadoiro, lastras no Recreo -entón José Antonio-, etc.).

 
  Ese martes 14 as festas comezaron ás 12 da mañá con repenique de campás, bombas e gaiteiros percorrendo as rúas. Ás 6 da tarde fixo a súa entrada na vila a Banda de Arca que ás 10 da noite sería a encargada de amenizar a primeira verbena nocturna na Alameda. Tanto esta como a rúa Alfonso Senra contaban cunha espectacular iluminación, instalada polo industrial pontevedrés Miguel Romero.

  Unha salva de potentes bombas anunciou o día grande das festas, o mércores 15. As dianas e alboradas estiveron a cargo da Banda de Arca e gaiteiros do país. Ás 9 e media da maña fixo a súa entrada na vila a laureada Banda do Rexemento de Infantería Zaragoza de Santiago. Ás 11 os xigantes e cabezudos pasearon polas rúas acompañando aos gaiteiros. Ás 12 tivo lugar a misa solemne cun orador invitado e logo a tradicional procesión onde se estreou a nova insignia parroquial. Ás dúas da tarde houbo concerto na Alameda onde se alternaron as dúas bandas, a de Arca e a dos militares. Tamén se elevou un "monumental" globo. Ás seis da tarde inaugurouse o campo de fútbol da Pinguela, a carón do río Cabrón, onde o Órdenes FC competiu cun "potente equipo forasteiro" para gañar un trofeo doado pola casa Terry. Ás 8 da tarde houbo un principio de verbena no que, xunto ás dúas bandas, tocou tamén para ledicia dos máis novos a Orquesta Spallant (máis coñecida como os Espallantes) co seu admirado vocalista, o guapo Álvaro Pita Alvarito. A verbena reanudouse ás 11 coas tres agrupacións, pero ademais cun espectáculo de lucería, fogos artificiais e elevación de "globos grotescos", obra dos famosos pirotécnicos de Oza dos Ríos, os irmáns Rocha.

  O xoves 16 iniciou como o anterior coas dúas bandas e os xigantes e cabezudos acompañando aos gaiteiros ás 10 da mañá. Ás 11 houbo unha carreira ciclista (exclusiva para corredores locais) co percorrido Ordes - Mesón - Ordes. Ás 12 tivo lugar a misa solemne na honra de san Roque e á unha o concerto das bandas. Pola tarde ás 5 foi o momento das carreiras de cintas na rúa Alfonso Senra, e ás 6 o das carreiras de relevos polas estradas próximas. Ás 8 e ás 11 de novo verbena coas bandas e os Espallantes, ademais doutra sesión de fogos, tracas e elevación de globos.

  O venres 17 houbo pasarrúas das bandas. De 12 a 3 paseo de moda e novo concerto a cargo das bandas. Ás 6 da tarde nova carreira ciclista, pero esta xa non estaba limitada a corredores locais e o percorrido alcanzaba os 45 Km, pois o itinerario era Ordes - Mesía - Mesón do Vento - Ordes. Ás 8 da tarde houbo o concurso de baile galego con importantes premios en metálico ás parellas gañadoras. Ás 11 da noite gran baile que rematou cunha sesión de fogos artificiais.

  O sábado 18 comezou ás nove con dianas e alboradas. De 12 ás 2 da tarde a sesión vermú na Alameda. Ás 6 da tarde tiveron lugar rifas dos números que se venderan pola Comisión de festas con "mágnificos regalos" para os gañadores. Ás sete unha carreira de cabalos do país. Ás oito festa polular e ás 11 a última verbena que rematou a "altas horas" coa habitual sesión de fogos artificiais.

  O domingo 19, aproveitando que era día de feira, houbo un concurso de gando do país con premios en metálico por valor de 7.500 pesetas. Seguiron os concertos e bailes como en días anteriores. E así remataron unhas das festas máis memorables da historia de Ordes.