O Regato Mercurín

   O regato Mercurín, un dos afluentes do Cabrón, é o río que pasa pola vila de Ordes.

  Ten o seu nacemento na parroquia de Mercurín, en dúas fontes que hai preto da aldea do Vilar. Os dous pequenos regos xúntanse ao leste de Guntín e avanzan cara ao sur. Este curso alto en Mercurín ten aproximadamente uns 2,5 km.

  Pasado Mañufe o regato Mercurín intérnase na parroquia de Ordes onde o seu curso será duns 5,7 km. Preto de Vilaverde ten un pequeno afluente, o rego da Fraga. Xa ten percorrido uns 5.400 metros cando chega á vila. Uns 900 metros despois pasa por baixo da N-550 e case dous km despois desemboca no río Cabrón, moi preto do Marisans. A súa lonxitude total é duns 8.300 metros.

  Nas súas marxes está o Paseo Ramiro Recouso e un roteiro de sendeirismo (opción longa e curta). Tamén hai ata 8 muíños, algúns restaurados e outros en bastante mal estado, pero ningún en funcionamento. 

  Anecdoticamente, como acostuma pasar cos ríos pequenos, houbo sempre moita confusión co seu nome. Na parroquia de Mercurín obviamente sempre lle chamaron río de Mercurín pero en Ordes antigamente era habitual chamarlle rego da Fraga ou río da Braña. Non obstante, tanto nos mapas como en documentos notariales de principios do século XX aparece como río Carboeiro. Nos anos 80 púxose de moda chamarlle río Mirón e a principios do século XXI era habitual confundilo co Cabrón.