Juan Ríos
García naceu no Casal arredor do ano 1894, nunha familia de varios
irmáns (José*, Jesús, Manuel...). Juan, que era pequeno pero ancho de ombros e
coas pernas algo escarranchadas, era coñecido na súa xuventude como Juanito
de Varela.
Como tantos
outros mozos daquela época emigrou a Cuba nos anos 10. Nos brañais da provincia
de Camagüey cortou leña para facer carbón e logo plantar cana de azucre no
sitio. Juanito, que era moi falador, contaba logo o durísimo que era aquel
traballo: tiña que carrexar troncos nunhas alforxas "coma as dun burro" e sacalos
do brañal por un carreiriño feito con paus. Se pisaba mal, espetábase na braña
ata a cintura e tiñan que arrincalo do lodo dous homes. Un dos seus compañeiros
foi o seu primo Estevo de Cestaños*, que o animou a deixar aquel traballo.
Juanito
fíxolle caso e pasou a traballar como maquinista dun tren de mercadorías
chamado "Santa Fe", no que viviu algunhas experiencias dignas dunha
novela.
Finalmente,
non vendo que Cuba fose aquela jauja que vendían todos, volveu
á súa terra, ao Casal, onde lle empezaron a chamar o Cubano.
Pouco
despois, na festa de San Pedro de Cestaños fíxose mozo de Manuela.
Manuela Martínez Varela (1901-1960) era a maior de
oito irmáns. Dous dos varóns tamén emigraron e outro, chamado José (1910-1952),
foi marmorista e morreu moi novo.
Con ela casou Juanito e tiveron 7 fillas e un fillo
varón: Josefina, Emilia, Jesusa, Julia, Estrella, Marina, Elvira e Roberto Ríos
Martínez. Despois de ter as primeiras tres fillas, aínda emigrou outra vez a Cuba, onde estivo dous anos.
Viviron no
Casal de Abaixo, fronte á casa de Alberte. Tamén fixo unha casiña no que entón lle chamaban Vista Alegre e
cambioulla a un tal Uzal por unha camioneta. Cando a camioneta se estropeu, levouna
ao taller de Castro e arranxouna el mesmo, o que lle valeu sona de magnífico
mecánico e o seu alcume definitivo de Rada (como Pablo Rada, o mecánico que viaxara no avión "Plus Ultra" con Ramón Franco).
Nos convulsos anos 30, Rada foi un activo militante de Izquierda Republicana e da Sociedade de Agricultores de Ordes, dando mitins polas parroquias tentando espallar as súas ideas. Chegou a ser un dos concelleiros da Corporación de marzo de 1936, durante o goberno da Fronte Popular.
Co Alzamento comezou a
represión e Rada foi detido xunto con outros esquerdistas de Ordes. Xulgado en Compostela por
traizón na causa 230/36 que remataría coa maioría
dos imputados fusilados en Boisaca en 1937. Comentouse que se salvou da pena de morte pola
intercesión dunha cuñada que estaba de criada na casa dun coronel coruñés, pero
isto é un rumor sen bases sólidas. Ao igual que
outros sete imputados, dos que se
consideraba que "non exerceron funcións directoras", recibiu a
sentencia de cadea perpetua, pero pasou só catro anos no cárcere, pois sería liberado nunha amnistía xeral que houbo no ano 1941.
Apoiou aos foucellas, levándolle algunha vez
viandas ao monte. Solicitáronlle un par de traxes de carabineiro
dun dos seus xenros e quixérono deter. El mesmo se entregou na Coruña e só estivo unha semana no cárcere. Marchou de Ordes, mercando
unha taberna na Rúa da Gaiteira na Coruña.
En xuño de 1960 morreu a súa muller, Manuela,
aos 59 anos de idade.
Rada viviu os seus últimos anos na Coruña. Morreu
en agosto de 1981 aos 87 anos e está soterrado no cemiterio coruñés de San Amaro.
A súa 4ª filla, Julia, casou con Francisco Remuiñán Figueira (1916-2005),
dunha moi coñecida familia de Parada propietaria dunha empresa madeireira.
A 5ª, Estrella, casou co carpinteiro Ricardo Moar Figueira (1930-1991) con quen pasou varios anos emigrada a Dortmund. Un dos dous
fillos do matrimonio foi Ricardo Moar Ríos Richard, futbolista do Deportivo e do Valladolid, club co que xogou varias
tempadas en 1ª División.
* José Ríos García Pepito do Alto, casou con María Vázquez Candal con quen viviu no Alto, pequena aldea
próxima á parroquia de Mercurín. Alí tería un posto cun boi. Un dos seus 7 fillos foi Arturo Ríos Vázquez, o propietario da Marisquería
Ríos no Portazgo.
Estevo
de Cestaños sería o patriarca dos
Estevos do Casal.
FONTE PRINCIPAL:
"Historia viva" de Manuel Rodríguez.
No hay comentarios:
Publicar un comentario