Arturo Ríos Vázquez

  Arturo Ríos Vázquez naceu en 1938 no lugar do Alto, parroquia de Ordes. Os seus pais eran José Ríos García Pepito do Alto* (1904-1995) e María Vázquez Candal (1911-1980), matrimonio que tivo 7 fillos: Manuel, Celia, Arturo, Aurora, Julio, Luciano e Cándido. 

  Arturo parecíase moito ao seu pai, pequeno e con moita chispa. Coñeceu e casou  cunha moza de Achán (Ardemil), Pura López Rosende, filla maior do matrimonio formado por Andrés López Gómez e Josefa Rosende Louro. 

 

  Pura é unha excelente cociñeira e foi a súa fiel acompañante na aventura hostaleira. Con ela tivo tres fillos: José, Arturo e Carlos Ríos Vázquez. 

 

   Arredor de 1967 montaron nunha pequena casa en Palavea o primeiro Restaurante Ríos. Con Pura aos fogóns, Arturo collía a furgoneta todos os días e conducía ata as lonxas da Costa da Morte para comprar e seleccionar o mellor produto para os clientes. Moitos anos despois Pura recordaba que ao principio regalaban as nécoras de tapa, cando posteriormente eran o máis caro do menú. Lograron ter éxito e coller moita sona, porque a pesar de ser un restaurante de gama alta o seus prezos sempre foron moi competitivos e accesibles e a atención esmerada. 

   En 1993 o local cambiou de ubicación, pasando a estar no Portazgo ao pé da N-550 nun moderno local. No ano 2009 renovouse con novos salóns e viñoteca. 

 

  Neses momentos o peso do negocio xa o levaban os seus tres fillos, pero na cociña seguía mandando Pura con algo de axuda: "Hai outros dous cociñeiros pero o marisco non mo toca ninguén". No 2015 Pura foi unha das catro gañadoras do prestixioso Premio de Gastronomía de Galicia "Toda unha vida" polo conxunto da súa traxectoria profesional. 

 

 

  A Marisquería Ríos segue a ser un dos lugares de referencia gastronómica da Coruña. Mesmo se comenta que hai clientes de Madrid que voan á cidade exclusivamente para comer nela. 

 

  Arturo enfermou no 2022 pero seguía indo ao local todos os días. Morreu o día 3 de xaneiro de 2023 e os seus restos repousan no cemiterio parroquial de Ardemil.

 

* Pepito do Alto, irmán de Rada, era moi coñecido porque tiña un posto cun touro semental ao que acudían campesiños de toda a contorna coas súas vacas.