O luns 13
de setembro de 1948, un día nubrado, tivo lugar a peregrinación conxunta
dos arciprestados de Berreo de Arriba e de Abaixo ata Santiago de Compostela.
Moitos ordenses aínda ían apesarados pola morte dous días antes do seu antigo mestre Nicolás del Río.
Nas súas reportaxes do día seguinte os xornais El Correo Gallego e La
Noche (nos que apareceu a mesma reseña) daban conta de que o número de
peregrinos era de 2.500, aínda que posteriormente outras fontes os reducirían a
unhas 1.715 almas. Nada que ver cos números de finais dos anos 30.
Presidiu a comitiva o arcipreste de Berreo de
Arriba, antigo profesor do Seminario Conciliar de Compostela don Joaquín Andrade Orza. Portaban os
estandartes a muller do alcalde de Ordes e o xuíz de instrución Mariano Rajoy Sobredo, que 7 anos despois sería pai do futuro
presidente do goberno español.
A ofrenda e lectura da invocación foi
presentada "con gran fervor santiaguista" polo médico Genaro González González, alcalde de
Ordes, e contestoulle cunha "elocuente
plática de felicitación" o bispo doutor José Souto Vizoso.
A misa foi celebrada polo arcipreste de
Berreo de Abaixo e párroco de Numide e Parada don Jesús Sánchez Verdeal.
Non faltou a típica foto nas escaleiras para
inmortalizar o momento.
No hay comentarios:
Publicar un comentario