A peregrinación de 1937

   A Igrexa foi unha institución moi atacada pola República, o que trouxo como consecuencia o seu apoio entusiasta ao bando franquista, cualificando a guerra como unha "cruzada" nos tempos modernos. Co novo réxime recuperou o protagonismo e a influencia que perdera.

  Sucederanse rogativas e novenas contra os "rojos impíos", nos muros das igrexas e cemiterios colocaranse placas en honra de José Antonio e dos caídos por "Dios y España" e o seguinte serían as misións de cristianización organizadas por Acción Católica.

 

  Dentro desta dinámica a Semana Santa foi moi espectacular, especialmente a procesión do Venres Santo onde portou o estandarte o avogado e secretario do Concello Juan Campos Fernández. Tamén se inaugurou un monumento construído polo tallista Adolfo Pérez Graña.

  Así mesmo, sendo 1937 Ano Santo, os distintos arciprestados organizaron peregrinacións (canto máis masivas mellor) a Santiago de Compostela. Nesta ocasión Berreo de Arriba (ao que pertencían 9 das 13 parroquias ordenses) efectuouna conxuntamente con Berreo de Abaixo (ao que pertencía Parada) o xoves 2 de setembro.

  Unhas 3.000 persoas, ou máis de 4.000 se damos crédito ao xornal El Compostelano, estaban pola mañá cedo en Santiago. A gran maioría viaxaran a pé (e en moitos casos toda a noite) para estar presentes. Segundo El Compostelano era a peregrinación máis numerosa ata ese momento e destacaba polo gran número de varóns, xa que era habitual que as mulleres superasen amplamente en número aos homes.

  Como era costume organizouse a comitiva en San Roque, diante de Santa Clara. Portaba o estandarte da sección masculina o secretario do Xulgado de Instrución Waldo Rivas e o da sección feminina Mercedes Salgueiro de Álvarez, ambos os dous debutantes nesta misión. Figuraban ademais outras bandeiras e estandartes. Outras personalidades eran os arciprestes, don Ramón Mosteiro Ferro e don Manuel Fernández, o alcalde de Ordes Julio Pol Caamaño con varios concelleiros, o xuíz de instrución Fernando Roldán e os alcaldes e concelleiros das principais localidades dos dous arciprestados. Alí foron cumprimentados por unha comisión de concelleiros de Santiago e por membros da Archiconfraría do Apóstolo. Despois do percorrido pola Algalia, Cervantes, Preguntoiro, Conga, Fonseca e Praza de España, entraron pola porta do Obradoiro, sendo recibidos polos cóengos Ruíz Rueda e Pío Gil.

  A continuación tivo lugar a misa solemne oficiada polo párroco de Meirama, mentres que o rezo do Rosario foi dirixido polo de Xesteda. Despois de funcionar o botafumeiro pasaron a orar diante da imaxe do Apóstolo e o seu santo sepulcro. Pola tarde moitos peregrinos efectuaron unha visita aos museos da catedral, regresando á tardiña aos seus respectivos lugares.