A familia del Río (Correos)

   Máis de 400 persoas en Ordes levan o apelido del Río. Hai por tanto numerosos portadores que non teñen relación próxima entre si.

  O patriarca desta rama familiar foi Pedro del Río Recouso o Carteiro (m.1926). Do seu matrimonio con Josefa Pampín Bello (1878-1948) tivo sete fillos: Manuel, Jesús, José, Ricardo, Pedro, Pilar e Antonio del Río Pampín. Tres deles tamén acabaron traballando en Correos. Outra característica destacada da familia foi a súa implicación na política dos convulsos anos 30 con consecuencias tráxicas.

 

  Manuel del Río Pampín o carteiro (1907-1937) herdou o posto á morte do seu pai. En 1930 casou con Milagros Rodríguez Maroño (1910-2004). Chegou a ser un dos líderes do Partido Socialista e membro do Comité da Fronte Popular. Detido despois do Alzamento, foi un dos xulgados na causa 230/36. Condenado a morte, sería fusilado en Boisaca o 8 de febreiro de 1936. Igual lle pasou ao seu irmán José del Río Pampín o Barbeiro (1913-1937), vinculado ao Partido Galeguista. Se este último estaba solteiro e sen fillos, Manuel deixou catro:

Manuel del Río Rodríguez Mañoliño do Carteiro (1931-2008) aprendeu o oficio de carpinteiro. Casou con Josefa Gómez González Fefa (1933-2022), filla do garda civil Jesús Gómez Iglesias. Emigrados a Düsseldorf, alí naceu o seu único fillo, o profesor de tecnoloxía e director do IES Ordes, Manuel del Río Gómez.

Pedro del Río Rodríguez (1932-1978) morreu aos 46 anos de cancro.

Aida del Río Rodríguez (1935-2022) casou con Laureano Vázquez Liñares (1934-2021) con quen viviu na Rúa da Fonte. Tiveron un único fillo: Laureanito.

Julio del Río Rodríguez Julio da Citroën casou con Jesusa Viqueira Otero, filla de José Antonio Veiras Viqueira de Nogalláns en Berreo (Trazo), pai tamén de Toribio das gasosas, e por tanto parente dos propietarios do Nogallás. Julio tivo un taller onde está a súa casa na parte sur de Alfonso Senra, xunto co seu tío político Jesús Castro, pero despois montou un concesionario de Citroën en Merelle, máis tarde trasladado á esquina do polígono. O matrimonio tivo tres fillos: Isabel, Julio e Cristina del Río Viqueira. Isabel, licenciada en Matemáticas, traballa no IGE, Julio seguiu co taller e Cristina é inspectora de obras.

 

Jesús del Río Pampín (1909-1972), o segundo irmán, tamén tivo ao parecer ideas de esquerdas, pero no seu caso logrou saír indemne dos perigosos anos 30. Traballou como barbeiro en Alfonso Senra na casa das Marcialas, que logo sería o "Bar Azul", pero tamén puido ingresar en Correos. Casou dúas veces, tendo un total de 9 fillos, e morreu aos 63 anos de idade.

Ricardo (1915-1998) foi o terceiro irmán que traballou en Correos, na cidade de Coruña. Casado con María Candal Vieites (m.2006), tía do tapiceiro de Leira, tivo catro fillos.

Pedro (1917-1995) tamén viviu na Coruña e traballou na Casa do Concello. Casou con Leonor Viaño Dono (1920-2009), filla do comerciante e concelleiro nos anos 20 Manuel Viaño Prado (m.1930) e de Casilda Dono González (1877-1946), que viviu os últimos anos con eles. O matrimonio tivo un único fillo: Ricardo del Río Viaño.

Pilar del Río Pampín (1919-1990) casou con Jesús Castro Castro* (1918-2003) procedente de Darefe, o que tivo o taller a medias co seu sobriño Julio. O matrimonio tivo catro fillos: José Antonio, Jaime, Manuel e Fernando Castro del Río. Todos eles son moi coñecidos en Ordes.

Antonio del Río Pampín (1922-1984), un dos mellores futbolistas dos anos 40 e 50 en Ordes coñecido como Toniño, taballou no Xulgado en Ordes e casou con Carmen Méndez Vázquez (1927-2019) unha moza procedente de San Mamede dos Anxos en Oroso. Con ela tivo dous fillos: Ramón e Lourdes del Río Méndez.

 

* Non confundir con Jesús Castro Castro o Padre Benito (1896-1977), fundador e propietario de "Talleres Castro SL" en Santiago, casado con Carmen Faya da Fábrica.