Accidente aéreo no Mesón

   En abril de 1964 Antonio Ramos, un rico veciño do Mesón do Vento morreu nun accidente de avioneta en Arteixo.

  Tres anos e uns días despois o pobo do Mesón volveu conmocionarse por culpa doutro accidente aéreo.

  O luns 1 de maio de 1967 ás 5 da tarde nunhas leiras próximas ao Mesón estrelouse unha avioneta francesa, modelo Jodel de tres prazas, propiedade do Centro Aeronáutico de Dijon.

  Pola mañá viaxara desde San Sebastián a Alvedro, aeroporto ao que chegou á unha da tarde. De alí despegou cara a Lavacolla pero a súa sorte estaba decidida e a súa viaxe remataría a 28 quilómetros do destino previsto.

  Os tres ocupantes da avioneta ían en peregrinación a Fátima. O piloto era Jean Marie Gabriel Revirón de 30 anos, natural de Gray. Os seus acompañantes eran Yves Jean Marie Ernest Gremier de 38 anos, natural de Tincey-et-Pontrebeau, e Marie Louise Hardorn tamén de 38 anos, natural de Corre e viúva de Méndez Vaquero. Os tres morreron instantaneamente co impacto. O piloto apareceu a varios metros dos restos da avioneta e os pasaxeiros, un ao lado e o outro atrapado no interior.

 

 

  Ao pouco tempo persoáronse no lugar a Garda Civil ao mando do capitán da Coruña Benito Morán Hidalgo e do tenente do posto de Ordes José Vilares Aranda. Para instruír as primeiras dilixencias chegaron o xuíz de 1ª Instancia de Ordes Ramón Montero Fernández Cid, o secretario Jesús Cristín, o auxiliar José Galán e o forense Antonio Concheiro.

  Ordenado o levantamento dos cadáveres, foron levados en dúas ambulancias ao depósito xudicial de Ordes. Alí tiñan previsto estar un par de días pero remataron por ser cinco. Finalmente o sábado 6 de maio serían trasladados en ambulancia ata París.