Incendios en Cerceda en 2016

  En Cerceda a noticia máis impactante de 2016 foi a sucesión de incendios provocados por unha veciña do lugar do Pumar.

  Carmen García Grela a Leiteira, que entón tiña 56 anos, era moi coñecida por estar casada cun empregado da gasolineira e porque debido ao seu mal carácter tiña gañado a inimizade dunha importante cantidade de xente.

  Ocorréuselle ese verán plantar lume ao monte e ademais preto de lugares habitados. Así que desde o día 18 de xullo fixo pequenas viaxes co seu coche e foi provocando incendios deixando no bosque unha candeíña acesa. Por certo que esas candeas aromáticas (non había doutra clase na tenda) comprábaas en paquetes de 12 no comercio chinés situado a escasos 50 metros da gasolineira.

  Con este pouco sofisticado pero efectivo modus operandi provocou 15 incendios que ocasionaron unha superficie queimada de 22 hectáreas e ademais sempre a menos de tres quilómetros da súa casa.

  Carmen pronto foi considerada a principal sospeitosa, así que os axentes do Servizo de Protección da Natureza (Seprona) e do posto da Garda Civil de Ordes montaron un operativo de vixilancia que a descubriu o día 12 de agosto saíndo ás 7 da mañá da súa casa nun coche. Efectuou sete paradas, deixando sempre unha candea ardendo. Unha foi retirada por un veciño e as outras seis polos axentes.

  Ás 7 e media foi detida a pesar de ofrecer resistencia. No vehículo acháronse as outras cinco candeas do paquete, unha caixa de mistos e nada menos que... nove mecheros! Claramente non era sofisticada pero si extremadamente previsora. Destaca a ironía de que un dos aparellos estaba decorado coa frase «Amo Galicia», cousa que chamou moito a atención.

 

  Carmen foi metida en prisión preventiva á espera do xuízo, que tivo lugar o 11 de abril de 2018 na Audiencia Provincial da Coruña.

  O seu avogado alcanzou un acordo coa Fiscalía polo que aceptaba catro anos e medio de cárcere (menos o ano e medio que xa levaba en prisión), é dicir, ata o 2020, o terribe ano da pandemia.