O ano 1951

  En 1951 o ano comezou coa inauguración oficial da sede da ONU en New York. Pero, contrastando con ese símbolo de paz, seguía a Guerra de Corea, agora con ventaxa para o Norte, e as dúas potencias detonaban cada dous por tres bombas atómicas de proba. Europa mentres tanto avanzaba cara á súa integración creando en abril a CECA (Comunidade Europea do Carbón e do Aceiro). En Oriente medio continuaba a tensión coa morte en xullo do rei Abdullah Ibn Husayn de Xordania en Xerusalén e a loita de tropas inglesas coas exipcias na canle de Suez. Algo parecido pasaba máis ao leste co asasinato en outubro de Liaquat Ali Khan, o primeiro ministro da historia de Pakistán.

  Dentro dos aspectos positivos, en Arxentina votaron as mulleres por primeira vez (incluída unha enferma Eva Perón), William Shockley inventou o transistor de contacto de punto e en Alemaña apareceron os LPs, os discos de longa duración. Marguerite Yourcenar publicou "Mémoires d'Hadrien" e J.D. Salinger "The Catcher in the Rye", mentres o arxentino Fangio era campión por primeira vez de Fórmula I. Nese ano comezouse a emitir na televisión dos USA a serie "I love Lucy" que sería un éxito clamoroso nos anos 50.

 

  En España 1951 tamén foi contraditorio. Para o Réxime foi un ano triunfal despois do recoñecemento internacional, simbolizado en xaneiro pola primeira chegada ao porto de Barcelona dunha división da VI frota estadounidense. 

  A economía en cambio non acababa de funcionar. Igualouse a RPC de 1935 pero foi un ano de malas colleitas e o número de defuncións volveu subir de 300.000 (o máis alto desde 1946). As penosas condicións laborais e a inflación ocasionaron novos disturbios. En Barcelona a notable subida do prezo dos tranvías foi respondida o 1 de marzo cun boicot que logrou a anulación da medida. Logo seguiu unha folga xeral secundada por unhas 400.000 persoas no cinto industrial da cidade. O Capitan Xeneral de Cataluña, o monárquico Juan Bautista Sánchez, negouse a sacar as tropas á rúa. Aínda así houbo medidas de forza e a folga foi paralizada. Tamén houbo protestas e folgas en Zaragoza, Pamplona, o norte do País Vasco e un boicot aos transportes en Madrid. A reacción chegou en xullo e foi unha remodelación do goberno para cambiar en parte a política económica, se ben continuou o predominio dos sectores católicos. Por fin entrou Carrero Blanco como subsecretario da Presidencia e o reformista Ruíz Giménez en Educación. Creouse ademais un novo Ministerio de Información e Turismo e desdobrouse o de Comercio e Industria.

  Ese ano Camilo José Cela publicou en Arxentina "La colmena" e García Iranzo o primeiro caderno do cómic "El cachorro". Tamén apareceu unha das mellores e máis descoñecidas películas da nosa historia, "Surcos" de Nieves Conde, aínda que no favor do público gañoulle Carmen Sevilla que estreou "El sueño de Andalucía" con Luis Mariano. O futbolista arxentino Roque Olsen veu para o Real Madrid e o húngaro Ladislao Kubala (escapado do comunismo) para o FC Barcelona.

  Nunha Galicia onde emigraron ese ano 25.200 persoas, a nova máis destacada foi en setembro o incendio do Mosteiro de Samos provocado por unha explosión nas destilerías que deixou un morto e dous feridos. Só quedaron as paredes e a igrexa e perdéronse valiosos manuscritos do padre Feijóo. Outra mala nova foi a marcha da empresa ourensá Barreiros a Madrid onde nos dous anos seguintes transformaría uns 700 motores de gasolina a diesel.

 

 

E que pasaba en Ordes? O máis importante foi o inicio das obras para a nova Casa Consistorial, pero ademais...

XANEIRO: Correspodéronlle 10 toneladas de cemento á Delegación comarcal de Ordes. Morreon o día 3 en Lesta con 90 anos Manuel Caamaño González, o día 4 con 77 anos o sacerdote Vicente Monteagudo Fernández, párroco desde 1903 de Vilamaior (e de Olas que estaba anexa) e o día 17 aos 82 anos Antonio Ferreiro Pérez Antón de Xan Ferreiro.Tamén faleceu en Beán a mociña Obdulia Fernández con só 15 anos.  

FEBREIRO: Detido Antonio Barreiro por delito de deserción. Outras 5 toneladas de cemento para a Delegación comarcal de Ordes. Morreu en Leira Rosa Bello Uzal  aos 76 anos de idade.

MARZO: O xefe da Estación de Ordes Lázaro Moreno foi trasladado á de Rivadavia.

ABRIL: Novo xefe da Estación Constantino Calierno. Morreu o día 3 o empresario e ex-alcalde Juan Liñares Iglesias e o 18 José Franqueira Ferreiro, pai biolóxico de Manuel Lois, aos 70 anos. En Barbeiros morreu Ramón Noya aos 50 anos, en Leira Victoriano Bello Uzal e Carmen Brandariz Rivas aos 27 anos, e en Lesta Manuel Reboredo Castro aos 63 anos.

MAIO: O día 20 no asilo de San Castor e Santa Adelaida en Portomouro o sexaxenario Constantino Iglesias matou a Juan Varela dun navallazo.

XUÑO: Pedida de man de Mª Carmen Astray para o médico balear Bartolomé Siquier Serra. Voda de José Mª Liñares Castro (m.2003), irmán do alcalde, con Josefina Martínez Feal na igrexa de Santa Lucía na Coruña.

XULLO: Pasou a Volta a Galicia por Ordes que foi meta e punto de partida da contrarreloxo ata Santiago. O gañador foi Manuel Céspedes. Faleceu Narciso Correal y Freire de Andrade, que fora nomeado "Fillo adoptivo" de Ordes en 1925. Morreu en Buscás Pedro Moar Fuentes aos 58 anos.

AGOSTO: A Banda de Arca, a do Rexemento "Zaragoza" de Santiago e a Orquesta Spallant nas festas patronais. Morreu en Buscás o construtor Manuel Ruibal Vilela  aos 80 anos de idade.

SETEMBRO: Manuel Vieites inaugurou a súa tenda de calzado no Recreo. Morreu en Buscás Carmen Moar Gómez.

OUTUBRO: A sucursal da caixa celebrou a "Fiesta del Ahorro", sorteando premios para promocionarse. Morreu en Ardemil aos 20 anos Pedro Brandariz Gómez.

NOVEMBRO: Morreron Domingo Mosquera Viqueira aos 74 anos en Buscás e Manuel Veiras Suárez aos 60 en Poulo.

DECEMBRO: Detido na Coruña Ernesto Sotomayor que roubou 50 reloxos nun comercio de Ordes. Morreu en Pereira Francisco Bello Suárez, patriarca da familia Bello, aos 82 anos de idade.