No Ordes do
século XIX e primeira metade do XX había unhas clases sociais moi marcadas,
baseadas fundamentalmente na capacidade económica, aínda que tamén se podían ter en conta outros
factores.
O
sistema era moi ríxido porque era moi raro que houbese un matrimonio entre membros
de clases diferentes e se o había era entre dúas que estaban contiguas na
escala. Isto ocasionaba que bastantes mulleres das clases máis altas quedasen
solteiras porque se non tiñan pretendentes dentro do seu grupo social xa non
concibían outra posibilidade. Era máis fácil que un home casase cunha muller
dun grupo social inferior (especialmente se era fermosa) que ao contrario.
No lugar máis
alto desta escala social estaba o que podiamos chamar a burguesía ilustrada, é dicir, aqueles que tiñan estudos universitarios
e traballaban para a administración, ocupando os postos claves na vila: xuíces, avogados, notarios,
procuradores, escribáns, médicos, boticarios... moitos deles tamén grandes
propietarios.
Falamos
de familias como os Pol, Troche, Stolle, Concheiro, Liñares, Astray, Álvarez, del Río... nas que os seus membros tiñan estudos, incluídas as mulleres que
maioritariamente debían dedicarse ao maxisterio, a única carreira que se
lles permitía na práctica.
Eran os
que detentaban o poder político, que no distrito de Ordes, agás breves pausas,
sempre estivo vinculado ao Partido Liberal, do que era representante Saturnino Aller.
Nun
segundo chanzo estaba a burguesía
industrial (comerciantes e empresarios). Como na actualidade, os
empresarios máis ricos e exitosos estaban máis alto na escala social, próximos
á clase superior. Falamos aquí de familias como os Faya (fábrica de curtidos), Pardo
(obras públicas), Mariño (comercio), Calvo (comercio), Abeijón (comercio),
Amado (comercio) ...
Loxicamente
había tamén moitos pequenos comerciantes menos adiñeirados que non estaban a ese nivel.
Un lugar parecido na escala ocupábano os grandes propietarios agrarios. En todas as parroquias había ricas
familias campesiñas con gran cantidade de terras, das que unha gran parte
dábanas en arrendo. Tiñan por tanto gran poder económico e influencia porque
outras familias campesiñas máis pobres dependían directamente delas. Ás veces
participaban en política e ocupaban cargos de concelleiro.
Algunhas destas
familias como os Pérez de Barbeiros ou os Veiras de Poulo tiñan ou tiveron no
pasado paradas de sementais.
Para
conservar a maior cantidade posible de terra dentro da familia herdaba a maior
parte (normalmente) o primoxénito. Noutras partes de Galicia era denominado
petrucio, aquí en Ordes simplemente chamábaselle "o millorado". Os
outros irmáns podían quedar case sen nada e en moitos casos emigraban ou se
mesturaban co resto do campesiñado.
Como as
monarquías, estas familias estaban interconectadas por múltiples ligazóns
matrimoniais. Así os Pérez estaban emparentados cos Moar e os Veiras, estes cos Bello, os
Moar e os Mosquera de Poulo, os Mosquera de Ordes cos Villaverde e os Barreiros do Casal ...
O
cuarto chanzo ocupábano os escasos obreiros urbanos e o pequeno campesiñado que era de lonxe o grupo máis numeroso. O
traballo campesiño era tan sacrificado naqueles tempos que os traballadores na
vila, aínda as criadas nas casas, considerábanse por enriba deles.
Efectivamente, era unha vida durísima e sempre
ao límite porque calquera contratempo tal como un accidente, enfermidade propia
ou do gando ou sinxelamente un par de anos de malas colleitas podían facerlles
perder as súas posesións. Se tiñan sorte podían traballar terras alleas, sendo
coñecidos como foreiros ou caseiros.
A
emigración a América sempre foi un recurso para fuxir da pobreza e, ás veces,
para escapar do longo servizo militar ou da Guerra de Marrocos.
O
último lugar na escala social era o proletariado
agrario, os que en Ordes eran coñecidos como "caseteiros". Non posuían
terras polo que tiñan que traballar as alleas como xornaleiros e vivían en
pequenas casas nos peores lugares das aldeas. Os solteiros ás veces non
tiñan casa propia e durmían nalgún lugar que lles proporcionaban os seus empregadores. Tal era a vida de Manuel Lois.
No hay comentarios:
Publicar un comentario