Jaime de Castro García

  Jaime Castro (o "de" veu despois) naceu en 1913. Foi un ordense "accidental". O seu pai, Ignacio Castro Iglesias era membro da rica familia Castro de Oroso (o seu tío Francisco foi xuíz municipal dese concello nos anos 20 e propietario do Pazo de Meimixe nos Ánxeles, e a súa tía Encarnación foi muller de Manuel García Rivas -alcalde de Ordes de 1925 a 1929- e, á súa vez, tío de Domingo García Sabell). 

 Ignacio foi médico na vila máis de 15 anos, por iso os 7 fillos que tivo do seu matrimonio con Mª Josefa García Rodríguez, naceron na vila. Trasladouse a Santiago en 1925 e con el toda a familia.

  Javier, o maior dos varóns, tamén foi médico pero outros, coma Ignacio e Antonio, estudaron a carreira de Dereito en Santiago. Jaime (que era o 4º e que viviu ata os 12 anos en Ordes) foi deles o máis destacado, aínda que Antonio Castro chegou a ser alcalde de Santiago.

  En abril de 1942 aprobou as oposicións en Madrid e en xullo foi xuíz de 1ª instancia en Caldas de Reis. Ao ano seguinte foi para Cambados e logo para Bilbao e Vigo.

  Máis adiante foi nomeado presidente da Audiencia Provincial da Coruña e posteriormente das de Albacete, Extremadura e Valladolid.

 Entre outras distincións, foi condecorado coa Gran Cruz de Raimundo de Peñafort (a máis importante do mundo xudicial) e foi membro de honra da Asociación de juristas gallegos en Madrid (Iurisgama). No ano 1970 o alcalde de Ordes, Antonio Concheiro, declarou a súa intención de noemealo "Fillo predilecto" -era xunto con Juanjo Linares o ordense máis exitoso e destacado na época- pero, ao final, non se levou a cabo.

 Xubilouse como maxistrado do Tribunal Supremo en Madrid.

  Do seu matrimonio con María de la Cinta Fernández Barreiro tivo 6 fillos. Dous deles, Jaime (notario en Granollers e Barcelona) e Luis seguiron tamén a carreira xudicial, ao igual que un dos seus netos, Luis de Castro Mejuto, maxistrado do Tribunal Superior de Xustiza de Galicia.

  O feito máis dramático da súa vida tivo lugar en xaneiro de 1985 cando o seu fillo menor, Fernando, con 29 anos nese momento, suicidouse despois de disparar e ferir gravemente a dous membros dun tribunal de oposicións a notarías (ambos os dous sobreviviron). O suceso tivo moi ampla repercusión mediática naquela época.

  Jaime de Castro faleceu na Coruña o 21 de maio de 2010 aos 93 anos.