Cruceiro dos Ramos

   Na parroquia de Buscás, ademais do cruceiro da Rúa preto da igrexa de San Paio e un cruceiro particular nunha casa da Gorita, hai outro bastante peculiar ao que algún alcumou "cruceiro agochado". A razón é que está no bordo dun terreo arborado polo que, a maior parte do ano, é fácil pasar preto del sen decatarse da súa presenza. No inverno coa caída da folla xa é máis visible.

  O lugar denomínase Cruz de Pedra ou O Cruceiro e está a uns 200 metros ao norte dos Ramos e uns 80 metros ao leste do Camiño Inglés. Uns 60 metros máis ao norte hai unha casa en ruínas á que chamaban "Casa do Cruceiro" e coa que probablemente tivera relación.

  O cruceiro está integramente feito de pedra. É de pequeno tamaño, aproximadamente 2,60 metros. Non ten gradas e si un pedestal prismático de 40 centímetros desde o chan e 70 centímetros de lado. Del sae un varal cilíndrico que mide 1,60 metros de altura (cunha greta bastante importante case a 90 cm do pedestal).

  Non hai capitel senón un aro de metal  ao final do varal. Tampouco hai cruz, só unha Piedade esculpida moi toscamente e con restos de ser restaurada con cemento.

 

Contoume Pilar Abruñeiras, unha veciña do lugar, que a carón do cruceiro se soterraban os nenos que morrían sen bautizar. Tamén que unha vez o cruceiro foi roubado polos mozos do Mesón do Vento e logo recuperado polos mozos de Carballedo que o foron buscar montados nun tractor e comandados por un Cancelada. Despois volvérono a poñer no seu lugar de sempre.

  

   Se queres ver máis fotos e a súa ubicación nun mapa preme en Cruceiro dos Ramos da excelente web Todos los cruceiros de Galicia.