O ano 2006

  2006, ano da crise inmobiliaria en USA, non tivo acontecementos moi destacados -aparte de que Plutón deixou de ser un planeta- pero o mundo cambiaba sen volta atrás: Internet comezaba o seu dominio, chegando en xaneiro aos 1.100 millóns de usuarios (unha de cada sete persoas no mundo). Ao longo do ano a Wikipedia en inglés chegaría ao 1º millón de artigos, crearíase Twitter e Google compraría Youtube.

  En América acadou a presidencia de Bolivia o esquerdista Evo Morales (que pronto comezaría as nacionalizacións) e Lula da Siva foi reelixido en Brasil. En Europa o verán contemplou a independencia de Montegregro despois dun referendo. Pero os grandes problemas estaban no mundo árabe: Hamas venceu nas eleccións en Palestina e houbo manifestacións e incendio de embaixadas occidentais polo tema das caricaturas de Mahoma na prensa occidental. O ano rematou coa aparición do medio de comunicación global Al Jazeera en inglés, o asasinato de Pierre Gemayel e o aforcamento de Sadam Huseín.

 

En 2006 publicáronse "The Road" de Cormac McCarthy, "The Boy in the Striped Pyjamas" de Jhon Boyne e "La catedral del mar" de Ildefonso Falcones, e houbo películas como "The Departed", "Cars", "Volver" ou "El laberinto del fauno".   Musicalmente Shakira arrasou con "Hips Don't Lie", Amy Winehouse saltou ao estrelato co seu profético "Rehab" e debutou Gnarls Barkley con "Crazy". En castelán triunfou Gustavo Cerati e Julieta Venegas con "Me voy".

 

  En España cambiounos totalmente o ocio pois o 1 de xaneiro entrou en vigor a polémica lei antitabaco. Houbo novas económicas como a inauguración da T4 de Barajas e as OPAs de Gas Natural e EON sobre ENDESA, outras políticas como as reformas dos estatutos valenciano e andaluz e a victoria de Montilla en Cataluña, pero o tema do que máis se falou foi a negociación do goberno coa banda terrorista ETA despois de que esta declarase un alto o fogo en marzo. Tamén foi rechamante a aprobación en abril da 6ª Lei de Educación (LOE) e a aparición dunha nova cadea privada, La Sexta, de similar ideoloxía que o goberno. A nivel deportivo o ano foi incrible coa 2º Champions do FC Barcelona, o ouro do  MundoBasket de Xapón (cando a selección derrotou a Grecia 47-70 con Pau Gasol lesionado), o 2º Roland Garros de Nadal vencendo na final a Federer e o 2º campionato de Fórmula I de Fernando Alonso. Tristemente o 30 de decembro ETA fixo estalar un coche bomba no aparcamento da T4 matando a 2 persoas e rematando coa posibilidade dun acordo co goberno.

   En Galicia, a pesar de padecer un dos máis fríos invernos que se recordan, foi o ano dos incendios, porque houbo un terrorífico verán onde ardeu unha gran cantidade do noso territorio, unha proba de fogo (nunca mellor dito) para o aínda novato Bipartito de Touriño e Quintana, que lles pasaría factura. Doutra banda o PP, para pasmo dos rivais, repúxose rapidamente da derrota do ano anterior e na loita pola sucesión de Fraga venceu un case descoñecido Núñez Feijóo que unificaría o partido e dirixiría a "Travesía polo deserto" con man firme.

 

 En Ordes politicamente foi un ano de transición. Despois de todas as liortas do 2005 houbo como unha especie de tregua esperando as eleccións de 2007. Martino seguiu gobernando con certa tranquilidade mentres os seus inimigos preparaban a macheta, principalmente Manuel Regos que creou unha lista independente denominada UxO.

  Eran tempos de bonanza económica (aínda que houbese 790 persoas apuntadas ao paro) e cunha movida descontrolada na que asomaban os primeiros signos de desgaste. Esa movida tamén proporcionaba anécdotas como a do "secuestro a punta de navalla" do taxista Ismael Candal en febreiro, que veu sendo unha Fake news porque despois dunha intensa busca por parte da Garda Civil e a Policía Local resultou que ao final estaba de marcha cos amigos e apareceu san, salvo e bastante sorprendido con todo aquel rebumbio.

  E cando non era movida eran festas. En xuño tivo lugar a 2ª Festa do Madeirista, organizada por Internaco, que contou cos irmáns Ulav de Noruega (eses si que sabían usar a macheta). En xullo as festas de Parada, que estaban naqueles tempos organizadas pola Asociación Triquitraque, incluían unha potente e exitosa churrascada, e en Montaos no campo de Nivelos tiña lugar a 2ª edición do Revoltosa Rock. En agosto a Asociación Castro da Croa creou a entón chamada "Festa da sega e da malla" en Ardemil, contando ademais cunha exposición de maquinaria antiga propiedade de Orencio Uzal. Esta festa consolidaríase e segue a celebrarse. As patronais de Ordes contaron coa presenza da Panorama e remataron cun festival de rock no que participaron Los ilegales, Zënzar e os Gin Tonics.

  Unha decepción foi en maio o grupo El Sueño de Morfeo, pois a súa solista Raquel del Rosario estaba nunha mediática relación co piloto Alonso, pero á súa actuación en LP45 apenas se achegaron 200 persoas. Outro famoso que veu a LP en 2006 foi o arxentino Coti.

  A gran alegría do ano deuna a SD Ordes que volveu á Terceira División despois de 11 anos de penar por categorias inferiores. Gran parte de culpa tivérona o adestrador José Antonio Cambón que levaba tres anos dirixindo ao club e o goleador Guillermo que lamentablemente rematou a súa estadía marchando ao Montañeros de Preferente.

  Xuño foi o peor mes pois xuntou os incendios forestais cun brote de varicela nos colexios e cunha vertedura contaminante no río Cabrón que matou centos de troitas.

  Tampouco eran bos tempos en Cerceda pois o peche da mina de Meirama abocaba ao paro a uns 220 traballadores. Máis de 500 persoas a pesar da choiva ocuparon as rúas de Ordes a finais de setembro na maior manifestación daquel ano.

  En novembro concluíu por fin a concentración parcelaria nas parroquias de Ardemil e Leira e Pablo Viriato inaugurou na rúa Alfonso Senra a tenda Pisonero. Ese mes tamén estaba previsto aplicar a ORA na maioría das rúas céntricas da vila, pero como sempre houbo un longo retraso de varios meses.

  O ano remataría en LP45 cos cantos dos mozos participantes no concurso da TVG "Son de estrelas" que sería un gran éxito no ano 2007.