Cruceiro de Pereira

 

   O cruceiro de Pereira está situado no campo da festa onde tamén está o local social e antiga unitaria da parroquia, a uns 65 metros ao nordeste da igrexa de Santa Aia. 

  A base é unha plataforma cuadrangular de catro graos, e enriba deles un pedestal ao que está adosado unha imaxe dunha Piedade moi desgastada e erosionada. Que un cruceiro teña unha Piedade non é raro pero o lugar que ocupa neste cruceiro si o é.

 O varal, duns 2,20 metros de altura, é de forma cadrada pero con chafráns a certa altura. Na parte máis baixa hai restos dunha inscrición totalmente ilexible. 

  Tamén é bastante peculiar o capitel que ten uns 30 centímetros de altura. A súa forma é cúbica pero cos vértices superiores máis agudos e cun resalte algo curvado. En cada cara sobresae unha figura, entre as que podemos distinguir as de San Antón de Padua e San Francisco de Asís. A cruz, duns 70 centímetros, é bastante simple e sen adornos.

  Esa base cos seus catro graos fai que sexa un dos cruceiros de maior superficie, en cambio a súa altura de pouco máis de catro metros é  moi habitual na zona.  

  Se queres ver máis fotos e unha vista de rúa preme en Cruceiro de Pereira da excelente web Todos los cruceiros de Galicia.