O Castro Ceidón

 

  O castro Ceidón esta localizado na parroquia de Ordes, ao sueste da vila entre a rúa García Gerpe (que é a pista que vai á Espenica) e a estrada a Poulo CP-3802. 

  É un recinto máis ou menos circular que mide aproximadamente uns 130 metros de norte a sur e uns 120 de oeste a leste, sendo a súa superficie duns 11.000 metros cadrados (uns 17 ferrados). Como tantos outros castros da zona, o terreo está destinado a usos agrícolas e en diversas zonas hai unha vexetación tan densa que é imposible facerse unha idea exacta do lugar. 

  Na súa parte occidental hai un alto terraplén reforzado cun parapeto onde se situaría un foso e un contrafoso, que xa non existen na zona meridional. Na zona norte, xunto a unha profunda depresión do terreo existe un camiño que permite entrar ao interior do recinto, hoxe case totalmente cuberto de arboredo. Na zona leste hai unha terraza defendida por foso e parapeto, visibles porque houbo unha recente corta de árbores que danou algo o parapeto. 

  Ao norte do castro localizábase unha fonte chamada a "fonte das Meigas", orixe dunha lenda popular na zona.

  Respecto ao seu nome, segundo Fernando Cabeza Quiles, Ceide é un arabismo procedente do nome persoal Zaide (posiblemente relacionado coa palabra sîd ‘señor’ -como o Cid Campeador-). Así Ceidón sería o nome dun xigantesco mouro que habitaba o castro nas antigas lendas. Non obstante no Catastro del Marqués de la Ensenada o topónimo está escrito como "Seirón", así que segundo Moralejo Lasso tamén existe a posibilidade de que teña orixe no termo *sahrja ‘pequeno cesto’ (as murallas térreas dos castros estarían feitas "a cestadas"). Na máis moderna Carta Geométrica de Galicia (1834) de Domingo Fontán aparece moi destacado como "Castro de Seisdón".