Escudo do pazo do Peñasco

  Mentres que o lugar do Peñasco e o rochedo que lle da nome están en territorio ordense*, o pazo do Peñasco áchase na mesma fronteira pero dentro da parroquia de Abellá, no concello de Frades.

   O escudo do pazo, moi sinxelo, consta dunha cimeira con liñas curvas de adorno a ambos os dous lados, enriba dunha pequena cruz de Malta. Debaixo o escudo propiamente dito que está dividido en catro cuarteis.

   No primeiro vese a cabeza de lobo dos Moscoso, nome achegado á casa por matrimonio. No segundo podemos ver o posible M dos Montenegro e no terceiro atopamos o coñecido xaquelado dos Bermúdez que tamén está no actual escudo municipal.

  Estes blasóns repítense por toda a comarca. En Ordes concretamente, a cabeza de lobo dos Moscoso está no escudo do pazo de Bidueiro e no da Casa grande de Parada, o M dos Montenegro tamén está na Casa grande e o xaquelado dos Bermúdez podémolo ver no escudo do pazo do Bidueiro e no dos Carrucheiros en Ardemil.

 

  Non obstante, dado que o fundador do pazo a finais do século XVII foi don Pedro Vázquez Vaamonde de la Fuente, parece moi posible que tanto o segundo como o terceiro cuartel representen aos Vaamonde, porque un dos escudos desta familia parecíase moito ao dos Montenegro, xa que ambos os dous tiñan un gran M surmontado dunha coroa (aínda que no dos Vaamonde era dourada en campo de azur). Por outra parte o xaquelado de 15 pezas tamén podería non ser dos Bermúdez e si dos Vaamonde, aínda que neste caso alternaban goles e ouro.

  O último cuartel é unha torre ou castelo, tamén un blasón moi habitual. Non podemos precisar con exactitude a que familia está dedicado pero dado que o primeiro apelido do fundador era Vázquez, podemos aventurar que alude a familia Vázquez (de feito, no val do Salnés en Cambados hai un escudo descrito como un castelo de ouro sobre fondo de goles e en Bergondo tamén hai outro castelo -neste caso de prata e con outros elementos de adorno- que representa a esta familia). 

  Outra posibilidade máis débil é que represente á familia González, pois don Pedro casou con dona María Gónzalez de Verea y Aguiar y Caamaño (posiblemente orixinaria do pazo de Codeseda en Leira). Os fillos deste matrimonio recibiron os apelidos Vázquez Vaamonde y González de Verea. Por último tamén podería representar conxuntamente ao matrimonio dos dous fundadores.

 

 *Algunha casa do Peñasco tamén pertence a Abellá.