A morte de Eugenio Jack

   Desde a aparición do Camiño Novo (hoxe N-550) Ordes sempre foi un lugar propicio para os accidentes de tráfico. No ano 1937 o máis grave e moi comentado polo nivel social das vítimas foi o que tivo lugar en Leira o sábado 9 de outubro.

 

  O capitán de aviación Eugenio Jack Caruncho, un heroe do bando franquista que tivera unha destacada participación no Alzamento na Coruña, ía a esta cidade conducindo o seu automóbil, acompañado da súa esposa Carmen Folla, a súa nai Arminda Caruncho e unha sobriña de pouca idade, filla do procurador de tribunais Domingo Sánchez Guisande e da súa irmá Josefina.

  Xa en Leira o coche do capitán chocou violentamente con outro vehículo quedando practicamente esnaquizado. Eugenio Jack Caruncho morreu case instantaneamente, a súa nai quedou gravemente ferida e a súa muller e sobriña (unha perna rota) tiveron lesións de menor consideración.

  Inmediatamente achegáronse os veciños ao coche e pouco despois os médicos que atenderon ás mulleres feridas. O cadáver do capitán foi depositado no local que a Falange tiña en Ordes onde estivo acompañado por familiares e personalidades de Santiago. De aí foi trasladado ás 11 da noite ata ao seu domicilio en Xeneral Pardiñas 7. As súas acompañantes foron ingresadas no Sanatorio do doutor Baltar onde as atenderon.

  O solemne enterro tivo lugar ao día seguinte ás dez da mañá (hora moi corrente naqueles tempos) na Igrexa de San Francisco e a el asistiron todas as autoridades da cidade. O féretro foi levado ata o coche fúnebre por varios oficiais, milicianos de aviación e familiares. No dó participaban o alcalde de Santiago e diversos altos graos do exército. Tamén estaba o seu irmán Guillermo Jack, capitán de Artillería, procedende da fronte de Teruel. A comitiva foi desde Xeneral Pardiñas ata a Porta do Camiño desde onde partiu ata a Coruña onde sería enterrado.

 

  Non foron bos tempos para a familia Jack. Outro irmán, Carlos Jack Caruncho capitán de Enxeñeiros, fora feito prisioneiro na fronte de Madrid e fusilado ese mesmo verán e a súa nai Arminda Caruncho Pazos (viúva de Ángel Jack Ocampo), a pesar de que pareceu experimentar unha leve melloría, morreu o mércores 13 de outubro como consecuencia dese accidente aos 59 anos de idade.