A Ponte de Pereira

 

   A ponte máis antiga de todo o concello de Ordes está no antigo Camiño Inglés sobre o rego da Ponte Ribeira, afluente do río Cabrón, a uns 570 metros ao sur da igrexa parroquial de Pereira.

  A súa orixe é moi antiga, medieval (e non se descarta que romana, pois Pereira foi a parroquia onde máis se ve a súa influenza). Atopamos referencias dela desde o século XVI.

  Testemuñas chamadas a declarar a raíz do preito sostido entre o arcebispo don Pedro Sarmiento e o conde de Altamira, don Lope Osorio de Moscoso, entre os anos 1539 e 1543 sobre as freguesías da terra de Montaos que eran da casa de Folgoso, din que no lugar do Carballo de Poulo “no camiño francés” estaba a picota da torre de Folgoso e engaden que os presos eran conducidos desde o cárcere da torre que estaba preto, ata a ponte de Pereira e de alí ao Carballo de Poulo, para ser finalmente axusticiados. No mesmo preito, outras testemuñas declaran que "había unha picota na Pereira que estaba xunto á ponte Pereira no camiño real que vai de Santiago a Coruña".

 

  O aspecto actual do lugar data de 2016, ano no que a estrada estivo pechada ao público (o que provocou protestas dos veciños) e se construíu unha estrutura de formigón armado case tocando a ponte medieval. O custo das obras foi de 84.000 euros.