sábado, 21 de noviembre de 2026

Casa Graña


  A Casa Graña é un coñecido restaurante ubicado no Hospital de Bruma, a pouco máis de 2 km do Mesón do Vento. Recordemos que a parroquia de Bruma, aínda que pertence ao concello de Mesía, é como unha illa que non ten contacto co resto do territorio municipal.
  A construción áchase ao sur da parroquia, a carón da igrexa de San Lourenzo. Isto fainos supoñer que está no mesmo lugar que o antigo hospital de peregrinos que da nome á vila.
 

  O hospital foi fundado polo abade do condado de Nemitos (ou Nendos), Pedro Crescóniz, no lugar de Rania Longa, no límite entre as Terras de Montaos e o condado de Nemitos. Existía xa no século XII, porque hai un documento do ano 1140 no que o rei Alfonso VII declara cales son os seus lindes. Tal vez funcionara tamén como leprosería porque en Vizoño hai un monte da Malata (topónimo relacionado con esta terrible enfermidade).
  Noutro documento de 25 de maio de 1175 Pedro Martís e a súa muller Urraca cedéronlle unha parte do terreo do lugar de Rama-Longa en Gruma: «de omni portione nostra ipsius hospitales de gruma».
  Ata o emperador Carlos I fixo unha parada en Bruma no século XVI.
 

 
Obviamente o edificio debeu ser modificado varias veces desde aqueles tempos. No século XX era o fogar da familia Graña Vázquez, que se dedicaban á gandería.
Emilio Graña Vázquez (1929-2003) foi un coñecido tratante de gando que casou con Esclavitud Bouzas Gómez. O matrimonio tivo catro fillos: Jesús, María, José Manuel e Mª Elena.
  Deles, María Graña Bouzas casou con José Fuentes Sánchez (1956-2012). Compraron a vella casa familiar e construíron a súa vivenda enfronte dela. No ano 2016 María restaurou totalmente o lugar e puxo unha casa de comidas. Hoxe, xa nas mans dunha das súas fillas, Érica Fuentes, segue a ser un dos restaurantes máis exitosos da zona.

No hay comentarios:

Publicar un comentario