Beleza capilar

   Se nos poñemos a pensar nalgunha calidade dos ordenses, seguro que nos veñen moitas á cabeza (a maioría negativas), pero probablemente o último que se nos ocorra é relacionalos coa beleza.

  Por iso foi tan sorprendente para moitos o ano 2007, cando coñecemos a nova de que fora elixido Míster Coruña un mozo de Ordes.

  Ben, temos que matizar que non era un ordense de pura raza, pois os seus pais, Rogelio Bodelo Pichel (1954-2023) e Antonia Deus Fraga, aínda que veciños da rúa da Canteira, procedían da parroquia de Monzo (Trazo).

  Propietarios da fábrica de camisas Deus, o seu único fillo Rogelio Bodelo Deus xa naceu en Ordes en 1983 e medrou forte e lozano. A súa percha de 185 centímetros valeulle para xogar ao fútbol no equipo da vila, pero o de pegar patadas non era o seu.

  Viaxaba todos os días á Coruña a estudar Dirección e Administración de Empresas no Cesuga. Na cidade coñeceu no ano 2006 a Noelia Barreiro Naveiro, unha bela compostelá 3 anos máis nova, que estudaba Turismo no Centro Español de Novas Profesións, e coa que comezou a saír. Ela tiña en mente ser modelo e Rogelio, que simplemente a acompañaba, recibiu unha proposta da mesma axencia na que estaba ela. Ambos os dous presentáronse ao certame de beleza da Coruña (Noelia xa por 3º vez).

 

  E... xa temos o primeiro Míster Coruña ordense en decembro do 2007. Por certo que con todo o rebumbio a parella xa estaba desfeita cando gañaron, aínda que "mantiñan moi boa amizade".

  Agora había que ir polo trofeo nacional. E aquí chega o interesante: Rogelio logrou ser elixido entre o seis máis guapos de España, pero nas votacións paralelas que se celebraron na Internet sucedeu todo o contrario. Acadou oficiosamente o título de "Míster máis feo". Nalgún dos foros destacaban "a súa cara de brutote, as súas longas melenas e os seus anchos narices".

  A que se debía esta disparidade de criterio? Pois foi simplemente unha cuestión capilar. Rogelio cortouse as súas melenas para a final, e ao revés que Sansón, este cambio de look tróuxolle a fortuna. Podería dicirse que gañou "polos pelos".

  Xa lanzado, en Finestrat (Alacante) foi gañador do concurso Best Model of the World en xullo de 2008. Días despois recibiu unha homenaxe na Casa do concello á que asistiron unha chea de mulleres que querían coñecelo.

 

  Rogelio seguiu durante algún tempo pola senda da moda, pero hoxe xa está fóra de ese mundo.