A familia Cancelada

   O apelido Cancelada é escasísimo. Segundo o ILG só hai 36 portadores en toda Galicia (21 en Ordes e 15 na Coruña!!!) Claramente no noso concello está a súa orixe. E dentro do concello no lugar de Carballedo, pequena aldea no leste da parroquia de Buscás, moi preto da autoestrada.

   Alí viviu o patriarca da familia, Vicente Cancelada que casou con Josefa Salgueiro Camba (m.1902) e foron os pais de Jacobo Cancelada Salgueiro (ou Salgueiros, que dos dous modos aparece escrito). Sabemos que tivo polo menos un par de irmáns: Manuel e Isabel. Esta última casou para Mercurín con Pedro Martínez Bouzas e foi avoa dos moitos irmáns Martínez Viqueira, entre os que estaba Pilar do Sanatorio.

  Volvendo a Jacobo, foi un dos homes máis ricos da parroquia só por detrás dos Moar. Ao igual que estes, tamén participou na política municipal sendo concelleiro na década dos anos 10 e moito despois arredor de 1930. Casou con Francisca Villaverde, coa que tivo polo menos catro fillos: Vicente, Manuel, Antonio e Jesús Cancelada Villaverde. 

 

Vicente Cancelada Villaverde (1886-1975), o primoxénito, foi concelleiro nos anos 30. Casou con Mª Antonia Veiras Pérez (1888-1979), filla de José Veiras Camba (dos Veiras de Pardiñas) e de Josefa Pérez Souto (dos Peres de Barbeiros). O matrimonio non tería fillos.

Manuel Cancelada Villaverde (1889-1974), o 2º irmán, casou con Mª Josefa Viqueira Veiras (1906-1980), que tamén era 2ª filla de Ricardo Viqueira Regueiro de Nogalláns, Berreo (Trazo), e por tanto irmá de Mercedes a muller do fundador do "Nogallás". O matrimonio, que viviu no Paraíso, tampouco tivo fillos e as súas propiedades foron para as súas afilladas, Lourdes e Fefa do Nogallás.

Antonio Cancelada Villaverde emigrou.

Jesús Cancelada Villaverde (1892-1973) tamén quedou en Carballedo. Casou con María Veiras e, ao contrario que os seus irmáns, tivo 8 fillos: Manuel, José, Vicente, Jesús, Francisco, Gumersindo, Andrés e Cándida Cancelada Villaverde.

 

Manuel Cancelada Veiras (1918-2001) viviu na rúa de Galicia (entón General Mola), ao lado do almacén de Calvo e era tratante de madeira. Non casou e rematou os seus días na Residencia San Marcos de Santiago.

José Cancelada Veiras (1919-1997) foi o que quedou en Carballedo. Casou con Mª Luisa Viqueira Moar (1924-2014) coa que tivo 3 fillos: Vicente, Mª Carmen e José María.

Vicente Cancelada Veiras (1926-2020) casou con Emilia Graña Gómez, filla de José Graña Blanco (dos da Maquía de Leira).

Jesús Cancelada Veiras (1928-2006) emigrou.

Francisco Cancelada Veiras (1929-2018) casou con Manuela Calviño Bascoy  e viviron en Santiago na Azabachería.

Gumersindo Cancelada Veiras (1931-2021) casou  con Mª Carmen Mirás Mariño (1931-1996), filla de José Mirás Gómez dos Mirás de Caboladrón e de José Mariño García (das Corredoiras). Gumersindo tivo un taller de rodas nos Lagartos 55, que herdou o seu fillo José Luis, aínda que agora o taller está na rúa Rosalía de Castro.

Andrés Cancelada Veiras (1932-2012). Con toda seguridade o máis famoso de todos porque foi conserxe do Colexio Castelao, así que a maioría dos ordenses que naceron a partir dos 60 coñecérono e poden contar centos de anécdotas do "Señor Cancelada". Casou con María Rivas Viqueira, filla do Compoñedor da Tiopeira, coa que viviu nos Lagartos.

Cándida Cancelada Veiras (1933-2012), a única muller entre os irmáns, casou para O Castro de Trasmonte con Jesús Mosquera Veiras (1926-2009), fillo de José Mosquera Bello dos Mosqueiras da Costa de Poulo.