Os Ferreiros do Casal

 

  Unha rama da familia Ferreiro foron os Ferreiros do Casal, que logo se estenderon tamén polo Recreo e o Balado.

  O patriarca foi José Ferreiro López, o maior de varios irmáns*, dos cales o máis coñecido na vila foi Ramón o Relojero.

  Ramón Ferreiro López (1892-1974) tiña unha reloxería a carón do que hoxe é o Banco de Santander. Casou con Xesusa Sánchez Patiño coa que tivo dous fillos: Ramón Ferreiro Sánchez Mitito (1928-1978), tamén reloxeiro e que apenas sobreviviu catro anos ao pai, e Anuncia (1930-2018). Ambos os dous morreron solteiros polo que desapareceu esta rama familiar.

  Outro dos irmáns foi Domingo Ferreiro López, establecido no Balado. Casou con Manuela Villaverde del Río (1894-1974) coa que tivo dous fillos: Amparo e Manuel Ferreiro Villaverde.

   Jesús Ferreiro López casou con Concha Rodríguez dos Carriles de Oroso, lugar onde se estableceu. Alí tiveron 5 fillos.

 

  Volvendo ao irmán maior José Ferreiro López (1879-1946), este casou cunha moza dos Xuncales de Lesta, Jesusa Juncal Bermúdez, coa que tivo 8 fillos: Antonio, Francisca, Manuel, Ramón, Jesús, José, Elvira e Sofía Ferreiro Juncal.

  Antonio (1917-1973) foi o que quedou na casa familiar. Casou con Jesusa Barreiro Mosquera (1915-1983), a 3ª filla de José Barreiro Recouso (1888-1963) o patriarca dos Barreiros do Casal.

  Tamén na casa familiar quedou Manuel (1922-1997) que morreu solteiro. Ramón, casado con América Recouso*, estableceuse no Recreo, Jesús emigrou a América e finalmente José (1927-2014) instalouse na Rúa de Buscás de onde era a súa muller Jesusa Boga.

  Francisca (1919-1992) casou para Darefe, Elvira (1929-2014) para Trasmonte, e Sofía (a máis nova) casou con Antón do Outeiro da parroquia de Poulo.

* O pai, probablemente, foi un rico propietario do Casal chamado Manuel Ferreiro Recouso.

  Os dous fillos de Ramón Ferreiro Juncal e América Recouso Boquete, Milagros Minucha e José Antonio, levan por tanto os apelidos Ferreiro Recouso, igual cos Ramechos e os Faberos, sen ter unha relación de parentesco próximo. De feito, cos Faberos, hai mais proximidade por parte da rama Recouso.