UN FINAL DE INFARTO
O país enteiro tiña postos os seus ollos nos
participantes da primeira edición de "Operación Triunfo" que ata eran
noticia do telexornal (o que daquela era unha gran novidade). O sistema de
eliminación dos participantes era mixto: había un xurado pero o público tiña a
última palabra. Desde un principio houbo tres favoritos claros: Rosa, David Bisbal e Chenoa. Pero como en toda boa obra que se prece tamén houbo a sorpresa
final. O
cántabro David Bustamante formou parte do trío gañador grazas ás mensaxes
masivas dos seus paisanos.
ADEUS PESETA, ADEUS ...
Foi a nosa mellor compañeira durante 131
anos. Naceu despois da revolución "Gloriosa" de
1868 e veu substituír ao real de vellón. No ano 1869 apareceu a primeira
peseta, inspirada nunha moeda do emperador hispalense Hadriano. Nela aparecía a
matrona Hispania cunha póla de oliveira na man e no reverso o escudo de
España. O seu nome, segundo algúns estudosos podería vir do catalán ou do
italiano e significaría "peciña". Logo de máis de 40 cambios de forma
e tamaño abandonounos o 28 de febreiro dese ano 2002.
MAREA NEGRA
Para Galicia tamén era un bo ano, aínda que
perdéramos a dous dos nosos máis importantes escritores: Camilo José Cela e
Carlos Casares.
Pero iso cambiou en novembro cando un
petroleiro chamado "Prestige", despois dunha errática vianxe onde se
luciron as autoridades, derramou a súa carga nas costas galegas.
Iso provocou unha gran indignación e a creación da plataforma cidadá
"Nunca máis" que o 1 de decembro dese ano movilizou preto de 200.000 persoas nunha histórica manifestación en Santiago de Compostela.
MOVIDA SEN CONTROL
Ordes comezou o ano coa inauguración do Punto
Limpo e coa sobredose de José Luis, un mozo de 24 anos que apareceu sen vida no lavadoiro
do Recreo. En marzo foi liberado Manuel Queijo Rey, un mozo de 34 anos con problemas mentais que se autoinculpara do asasinato de Manuel Gómez Ramos, ocurrido en 1994 en Fosado.
En agosto inaugurouse a primeira rúa peonil da vila, a rúa Mundito, homenaxeando ao mesmo tempo tempo a Segismundo Viqueira e a Víctor González Faya.
En setembro comezaba o novo curso escolar coa
supresión das unitarias de Poulo e Vilamaior. Tamén foi anunciado o comezo da fase 1 da Ronda Leste, pero en realidade quedaría parada ata o ano 2009.
Os problemas máis graves foron como sempre os
provocados pola movida que comezaba a caer no exceso. Eran habituais estragos, altercados e
pelexas multitudinarias, o que ocasionou que en setembro aumentara o número
de policías locais e gardas civís para intentar controlar a situación, cousa que
non evitou unha agresión con arma branca a un mozo de Oroso en novembro.
O ano rematou cunha merecida homenaxe ao atleta Herminio Rial Naveiro de 39 anos poñendo o seu nome á praciña colindante coa Casa da Cultura.
|
2002 deu títulos cinematográficos tan interesantes como
"The Pianist" e o musical "Chicago" pero é máis recordado
pola primeira película de Tobey Maguire como "Spider-Man" e pola aparición
do esquío Scrat en "Ice Age".
Musicalmente foi o ano de Christina Aguilera, pero en España (e logo
no mundo) bailabamos ao son das Ketchup co seu "Aserejé" e "Que la detengan" de David Civera e coñecemos aquel ano a Juanes cantando "A Dios le pido".
|
No hay comentarios:
Publicar un comentario