Informe meteorolóxico 2021

   O ano 2021 éstivo marcado por un incremento dos fenómenos meteorolóxicos extremos, unha das consecuencias do cambio climático que os científicos levan anos advertindo.

 

  En  España destacaron dous fenómenos:

- En inverno a histórica Filomena, a maior nevada do século na que caeron flocos 36 horas sen parar, deixando espesores superiores a un metro de neve.

- En verán o novo record de temperatura máxima de 47,4ºC en Montoro (Córdoba) o 14 de agosto. Tamén bateron records propios Albacete, Ávila, Cuenca, Jaén, Madrid, Murcia, Navarra, Segovia, Soria, Teruel e Toledo, que superaron os 38ºC, e en varios puntos do sur peninsular superáronse os 46º C (en Canadá chegaron a 49,6ºC!). Ademais España foi o terceiro país de Europa con maior número de hectáreas queimadas polo lume e en California os devastadores incendios forestais permaneceron activos ata tres meses.

 

  En Galicia  foi un ano algo seco, especialmente o segundo semestre, e cálido.

  As temperaturas foron moi variables. Mentres xaneiro foi moi frío, especialmente na súa primeira metade, febreiro foi moi cálido debido ás masas de aire do suroeste. Abril de novo resultou cálido, pero en maio volveu o frío especialmente polas mañás e noites. O verán foi máis ben frío e, en cambio, setembro e outubro tiveron temperaturas máis altas do habitual. Novembro foi frío e decembro, en cambio, moi calido.

  As precipitacións foron algo máis baixas do habitual. Xaneiro foi húmido, especialmente a 2ª metade do mes na que chegaron borrascas como Gaetán (19), Hortense (21-22), Ignacio (23) e Justine (29-30). Febreiro foi tamén moi húmido, destacando a borrasca Karim (19), mentres marzo resultou bastante seco. Maio e xuño foron bastante húmidos, especialmente este último con chuvias persistentes do 17 ao 21, e logo xullo e agosto secos. Outubro e novembro volveron a ser máis secos do habitual, mentres decembro tivo unha cantidade de precipitacións normal aínda que dividida en moitos días.

 

  Na comarca de Ordes destacou un episodio que sucedeu o 2 de outubro.

  Os refachos de vento que houbo esa noite estragaron amplas extensións de millo, que estaba a punto de ser recollido e non puido ser aproveitado como forraxe. En moi pouco tempo, quizais dúas horas escasas, diversas explotacións gandeiras de toda a comarca perderon unha parte considerable do traballo de todo o ano. Por exemplo un gandeiro con plantacións na contorna da ponte do Lengüelle, no límite entre Oroso e Trazo, perdeu 8 das 16 hectáreas que tiña sementadas. Tiveron que ser refachos moi fortes en lugares moi puntuais (unha especie de pequenos tornados) que explicarían que nunha mesma parcela houbese zonas que permanecesen intactas e outras fosen arrasadas.