Cancro en Galicia

    En febreiro de 2022 apareceu o Atlas da mortalidade por cancro en España e Portugal, un estudo feito con datos dos dous países recollidos entre 2003 e 2012, e que mostran curiosas diferenzas xeográficas nalgúns tipos de cancros.

PRÓSTATA

  É o cancro máis diagnosticado entre os homes, e o 3º en mortalidade. Os factores que afectan ao desenvolvemento deste tipo de cancro aínda non están claros e non se atopou evidencia científica de ningún axente carcinóxeno específico. Inflúen a historia familiar, factores xenéticos e a obesidade, xunto ao consumo na dieta diaria de certos elementos como calcio, carne e graxas. Hai unha zona con alta porcentaxe de afectados na fronteira entre as provincias da Coruña e Pontevedra.

 

PÁNCREAS

  É o oitavo cancro máis diagnosticado, pero 3º en mortalidade en España. O factor máis determinante é o tabaco, aínda que se inclúen outros condicionantes, como a pancreatite crónica ou hereditaria, algunhas alteracións xenéticas, obesidade e diabetes, ademais do exceso de consumo de alcol, carnes procesadas, fructosa e graxas saturadas. En Galicia, A Coruña e Vigo, coas súas áreas de influencia, son as máis afectadas. O cancro de páncreas é o que maior exceso de risco presenta en Ferrolterra, Eume e Ortegal. A probabilidade de mortalidade tamén é alta na área do Barbanza.

 

LARINXE

  Non é tan frecuente, pois ocupa o 20º posto en diagnóstico e o 18º en mortalidade. O exceso de mortalidade obsérvase exclusivamente en homes e asóciase co consumo excesivo de tabaco e de alcol. Incide en todo o norte de España: en Cantabria, en Asturias e en zonas do norte de Castela e León. En Galicia as áreas máis afectadas son as do oeste da comunidade. O mapa revela un exceso do risco de mortalidade no Ferrol, Narón e algúns municipios da ría ferrolá. Tamén é alta a incidencia nas comarcas de Soneira, Fisterra e Arousa. En Cambio non é frecuente na Galicia interior.

 

ESÓFAGO

  En España este tipo de cancro ocupa o posto 21º entre os máis diagnosticados. O Atlas describe un exceso de risco de morte entre os homes por este tipo de cancro no norte da Península. Están relacionados co desenvolvemento deste tumor o estilo de vida e algúns hábitos ou comportamentos, como un alto consumo de tabaco e alcol. Tamén inflúen outros factores, como a obesidade e o baixo consumo de froitas e vexetais. En Galicia as áreas máis afectadas son as maís occidentais.

 

ESTÓMAGO

  O Atlas suxire a existencia de factores ambientais que inflúen para ambos os dous sexos, como infeccións por Helicobacter pylori, o tabaco, traballos relacionados coa produción de caucho, exposición a asbestos e radiación ionizante. A zona na que se aprecia un maior risco de mortalidade está en Portugal, pero tamén se estende por Galicia na área máis próxima á fronteira con este país.

 

  No mapa inferior podedes ver o risco deses 5 tipos concretos de cancro na comarca de Ordes. Se clicades na ligazón podedes comparar datos co estudo do Sergas do ano 2019.