Os Fernández das Casillas

 

   O apelido Fernández é o segundo máis habitual en Galicia pero en Ordes, en cambio, non está entre os oito primeiros lugares da lista. Aínda así hai arredor de 400 portadores, a gran maioría deles na vila, especialmente na zona das Casillas.

  Alí viviu Juan Fernández Recouso, desde 1916 legoeiro (en castelán "peón caminero") da zona que ía das Casillas a Leira. Casado con Francisca Rey Presedo (1884-1965), tiveron numerosos fillos, entre eles Juan Antonio Fernández Rey Juanito o Capatás (1909-1998), que xa foi capataz de legoeiros e encargábase da estrada a Carballo, e Jesusa Fernández Rey (1911-2003) que casou con Antonio Raña e foi nai dos sete irmáns Raña Fernández de Montaos.

 

  Pero os Fernández Rey, non eran os únicos Fernández das Casillas: a finais do século XIX tamén viviron na zona dous irmáns, José (1861-1933) e Ricardo Fernández Varela. Tiñan boa posición económica e custeaban habitualmente a festa de San Antón en Guindibóo. De José sabemos que morreu en 1933 deixando un só fillo.

  Ricardo Fernández Varela, o patriarca da familia, foi capataz de legoeiros. Casou no século XIX con Carmen Recouso del Río, coa que tivo 8 fillos que chegaron á idade adulta.

 

Carmen pertencía aos Recousos de Vilar. Era irmá, entre outros, de José (n.1873, un legoeiro que rematou vivindo na Laracha), de Antón (n.1882 que viviu no Recreo e estivo no cárcere por matar a un curmán), de Andrea e de Manuela Recouso del Río (muller de Juan Ferreiro Franqueira -patriarca dos Faberos- e, por tanto, bisavoa miña), todos eles fillos de Francisco Recouso Viqueira e de María del Río Noya.

 

  Catro dos fillos (José Mª, Juan, Ricardo e Laureano) emigraron a América. Neste éxodo non tivo tanto que ver a necesidade económica como o non querer ir á guerra de Marrocos, de feito José Mª foi declarado prófugo en 1910.

  En Ordes quedaron 3 fillos varóns e unha muller: Jacinto, Jesús, Evaristo e Carmen Fernández Recouso.

 

  Jacinto Fernández Recouso (24 de agosto de 1893-1972) foi celador de telégrafos, o que significaba viaxar revisando o tendido e reparando as avarías (eran coñecidos popularmente como "alambreiros"). En 1934 gañou unha mención honorífica e un premio de 500 pesetas pola súa intervención durante a folga xeral de maio, a pesar de estar ferido. En 1940, época de penurias, cobraba 4.000 pesetas anuais. Casou con Juana Barreiro Recouso (1894-1986) da rica familia dos Barreiros do Casal, coa que tivo 5 fillos: Carmen, Mª Cruz, Concha, Ricardo e Jacinto.

  A máis coñecida na vila foi Mª Cruz Fernández Barreiro (1920-2013), sumamente simpática e faladora, que tiña unha zapatería no que hoxe é Alfonso Senra 67 chamada "Calzados Mallorca". Estaba casada cun dos primeiros taxistas, Manuel Gómez Gende (1914-2005), evidentemente tamén moi coñecido.

 

  Jesús Fernández Recouso (1896-1978) foi o que continuou co oficio paterno de legoeiro e xa no ano 1934 acadou o posto de capataz. Casou cunha moza de Marzoa, Carmen Jarazo Uzal, e alí en Recouso na Fonte do Roxo estableceuse. Tiveron 5 fillos e un dos seus netos foi o perito agrícola Jesús Fernández que morreu aos 37 anos en accidente de tráfico.

 

  Evaristo Fernández Recouso (1898-1982) si participou na guerra de Marrocos onde foi ferido de certa gravidade. Ao igual que o seu irmán Chinto foi celador de telégrafos e tamén casou (ademais o mesmo día!) cunha moza dos Barreiros do Casal, Concepción Barreiro Recouso, coa que tivo 6 fillos (Elvira, Evaristo, Laureano, Ricardo, Dolores e Ángel Fernández Barreiro) que obviamente tiñan os mesmos apelidos que os seus curmáns. De feito houbo un, Ricardo (1925-1974), no que tamén coincidía o nome, o que lles trouxo numerosos problemas na recepción do correo.

  A maior, Elvira casou cun mozo de Montaos e o 3º, Laureano, seguiu os pasos do seu pai, traballando en telégrafos en Santiago. O resto quedaron no lugar. Evaristo morreu con 51 anos deixando unha única filla, Concha, casada con Manuel Suárez, o empresario que montou a gasolineira das Casillas.

 

  Carmen Fernández Recouso (1909-1987) tamén viviu nas Casillas e casou con Andrés Rodríguez Martínez con quen tivo tres fillos, Ricardo, Ángel e Manuel. O maior, Ricardo viviu no Paraíso e casou coa cuarta filla da panadeira Rosario.