Mª Carmen Nouche Porro

   Desde o 21 de decembro de 2021, día en que morreu a pontevedresa Luisa Vázquez de Silva, ata o 24 de agosto de 2022, Mª del Carmen Nouche cos seus 110 anos cumpridos foi a muller máis lonxeva de Galicia. 

 

  María del Carmen Nouche Porro naceu o 15 de setembro de 1911 na parroquia de Barbeiros e parece que xa a súa nai e avoa chegaron aos 100 anos de idade. Non obstante dentro da familia só ela herdou esta xenética privilexidada porque as súas tres irmás tiveron unha vida longa pero nada fóra do común. A maior, Jesusa Nouche Porro (1907-1993) casou para Aiazo e "só" chegou aos 86 anos. Isolina (1915-2004), a única que quedou en Barbeiros chegou aos 89, e a menor, Josefa (1918-2009), que viviu en Lavandeira de Abaixo, faleceu con 91 anos. 

 

  Obviamente nacendo antes da 1ª Guerra Mundial foi moi dura a vida de María -que así acostumaban chamala-. Con 7 anos sobreviviu ao pavoroso ano da gripe e con 21 casou para a parroquia de Poulo pero o seu marido morreu na guerra civil. Anos despois volveu casar con Modesto Mosquera Rodríguez (1906-1978). Con el criou tres fillos porque outros dous morreron ao pouco de nacer. Traballou duramente na casa, nas faenas agrícolas e vendendo queixos e outros produtos na feira de Ordes. 

  O máis notable é que conservou a saúde e a lucidez ata o final da súa vida. Só tiña mal oído e tomaba unha pastilla para a tensión. Pasou os últimos anos sentada na porta da súa casa da Senra mirando aos seus animais -porque nunca lle gustou a televisión-, conversando un pouco cos que pasaban e logo cando entraba na casa ou en inverno sentada confortablemente ao lume da lareira. 

 

  Antonio Mosquera Nouche, o fillo maior nacido en 1941, é o único que a sobreviviu. Tanto el como a segunda irmá, Carmen -que casou co británico David Robinson-, emigraron nos anos 60 ao Reino Unido, polo que varios dos seis netos de María viven nese país, ao igual que a maioría dos seus dez bisnetos e da súa única tataraneta, Honey-Rose.   

  O terceiro fillo, Luciano (1948-2010), que vivía nesa casa de Senra, morreu aos 62 anos. Eran a súa muller Carmén López Rosende e a súa filla Lucía Mosquera quen coidaron de María. 

 

  Na última festa de aniversario que celebrou, o alcalde e a Asociación de Veciños entregáronlle unha placa de felicitación "por 110 anos de sacrificio, humildade, esforzo e traballo". Pero o regalo máis prezado levoullo o párroco de Poulo: unha bendición do mesmo Papa Francisco, xestionada a través da Nunciatura.  

  María faleceu o 24 de agosto de 2022, faltando 22 días para cumprir 111 anos. Está soterrada no cemiterio parroquial de Poulo. Substituíuna no posto de galego máis vello o pintor vigués Luis Torras.