Escudos na igrexa de Galegos

  O primeiro escudo que podemos ver na igrexa de San Martiño de Galegos está na clave do arco que separa a nave do presbiterio. Está bastante desgastado pero pódense observar con certa clarirade as cinco cabezas de lobo da familia Mosquera (que dan fe da súa relación cos Moscoso). Unha peculiaridade é que as cabezas miran cara a súa esquerda, ao contrario do que é habitual, cousa que tamén sucede no escudo que está no pazo de Galegos.

 

  Xa no presbiterio, nos dous muros laterais hai dous grandes retablos pétreos que conteñen as tumbas de don Gómez Mosquera Pimentel (muro norte) e da súa esposa Dª María Enríquez (muro sur). No centro dos retablos destacan uns escudos sumamente adornados e coroados duns helmos que miran cara á súa dereita.

  O da esquerda, o de don Gómez Mosquera ten aparentemente catro cuarteis. No primeiro volvemos a ver as cinco cabezas de lobo da linaxe Mosquera (que manteñen a mesma orientación que no escudo do arco). O segundo e o terceiro corresponden aos Pimentel, cuxo escudo constaba de 5 cunchas de prata en campo de sinople (cor verde) e, doutra banda, de tres faixas de goles (cor vermella) en campo dourado. O último cuartel representa á moi coñecida familia Andrade coa súa habitual faixa de dragantes. Non obstante aínda quedan o gran M cunha coroa que aparece na punta e que alude aos Montenegro e as cinco cunchas de vieira que están colocadas na cruz que cuartela o escudo e que representan aos Ribadeneira, cuxas armas eran esas cinco cunchas de prata sobre unha cruz flordelisada de goles (cor vermella), as veces sobre fondo branco e outras veces en campo de ouro e con tres ondas de auga por debaixo.

 

 

  No escudo da dereita, o  de dona María Enríquez, vemos no primeiro cuartel unha torre de prata e nas ameas unha aguia de sable (negra) sobre fondo de azur que corresponde á linaxe dos Novoa. No segundo está o escudo mantelado dos Henríquez ou Enríquez, que presenta dous castelos de ouro sobre fondo de goles e abaixo un león de cor púrpura en campo de prata. No terceiro cuartel vemos as armas dos Quirós, dúas chaves e seis luneis de goles en orla en campo de azur, e no cuarto as cinco lúas crecentes (pero horizontais) en campo de azur dos Ambía. No medio do terceiro e cuarto cuartel hai outro escudo máis pequeno que representa á familia Villar e que consta dunhas bandas diagonais que alternan goles e prata.