Os nomes das vacas

 

   Contaba Xosé Ramón Alvite en La Voz de Galicia no ano 2017 que en Galicia estábase a perder o costume de poñer nomes ás vacas. Segundo o Control Leiteiro, das cen mellores vacas en produción do ano 2015, só a cuarta parte tiñan nome propio. Ao resto identificábanas cun número. Que tristeza! 

  Porque antigamente a vaca era todo para o campesiño galego, compartindo con el os días e os traballos, aportando para o seu sustento e vivindo xuntos penas e ledicias. A enfermidade da vaca podía ser máis devastadora para a economía familiar que a dunha persoa. 

  Por iso antes todas as vacas tiñan nomes, nomes que facían referencia a características como o físico, a idade ou o carácter. 

  Ultimamente en Galicia o nome máis usado é Paloma, que normalmente significa que esa vaca ten unha cor clara. Ségueno clásicos como Marela, Linda ou Pinta. Pero todos os nomes din algo do animal. Dunha Careta hai que supoñer que ten unha mancha branca na cara. Dunha Gallarda que ten moita prestancia, dunha Xuvenca que cando se lle puxo era a máis nova (logo pode chegar a ser moi vella pero o nome segue aí). Capitana é unha vaca mandona, en cambio Pastora tería un carácter dócil. 

  Manuel Pazos Gómez, o fundador do Obradoiro da Historia, hai anos que fixo un estudo sobre os nomes máis frecuentes das vacas na parroquia de Marzoa (Oroso). Creo que poden ser perfectamente extrapolables a outras parroquias da nosa comarca. 

Blanca	Ghallarda	Nova	Rabuda
Bonita	Gharrida	Pacheca	Romera
Cabana	Linda	Paloma	Rosa
Cachorra	Loura	Parda	Roxa
Careta	Lucera	Parrula	Rubia
Cornuda	Marela	Pequecha	Teixa
Coxa	Mora	Pequena	Tora
Danesa	Morena	Pinta	Turrona
Ferrada	Neghra	Princesa	Xuvenca