Rúa Euloxio R Ruibal

  Nado en Buscás no ano 1945, Euloxio Rodríguez foi o primeiro fillo do matrimonio formado por Manuel Rodríguez e Francisca Ruibal. A familia trasladouse a vivir a Santiago (á rúa Algalia de Abaixo) cando el era pequeno xunto coas súas irmás Mercedes e Carmen, pero sempre reivindicou o nome de Ordes.

  Pronto destacou como escritor, especialmente de obras de teatro, aínda que a súa actividade literaria abrangue tamén a narrativa, o ensaio, a poesía e o cine. Na actualidade é profesor asociado da Facultade de Ciencias da Información da Universidade de Santiago de Compostela. Tamén foi arquiveiro-bibliotecario desde o ano 2010 ao 2013 da RAG, institución á que pertence desde marzo de 2005.
  
  Entre os premios que ten recibido figuran o Abrente (1973 e 1975), o Álvaro Cunqueiro (1989) e o Valle Inclán (2005).
  Se vos interesa, podedes ver unha biografía máis ampla no seguinte enlace: Euloxio R. Ruibal.

  O 21 de marzo de 2013 o PSOE local propuxo nun pleno darlle a unha rúa o seu nome, proposta que foi aprobada por unanimidade. Como anécdota, a concelleira Silvia Marín (man dereita de Regos) entregoulle a cada membro da corporación un exemplar do poemario "Caderno de Ordes" editado había pouco pola editorial Toxosoutos.

 

 

  O 24 de abril -Día do Libro- do ano 2013 foi o día escollido para a ceremonia. O propio escritor, xunto á súa nai e ao alcalde Manuel Regos, descubría a placa na que ata ese momento se coñecía como "Rúa Tras o campo da feira", despois de ter unha sesión de contacontos na Biblioteca Municipal.

  Foi a última rúa da vila en ser inaugurada ou cambiada de nome ata o 2020, ano no que a parte norte da Rúa Nova comezou a chamarse Ramón Carro.