sábado, 3 de diciembre de 2016

A familia Liñares

  Unha das familias máis ricas de Ordes foron os Liñares, propietarios da mellor zona do pobo, a esquina nordeste do cruce. Sen embargo hoxe apenas queda algún membro na vila porque a maioría marcharon a outros lugares.

  O patriarca da familia foi, no século XIX, Juan Liñares Carmuega casado con Carmen Iglesias Rodríguez. O seu fillo, Gumersindo Liñares Iglesias (m. 1929), foi alcalde de Trazo durante 18 anos. Politicamente, apoiou a Antonio del Río, pero cando este caeu non tivo problemas en pasar ao bando de Saturnino Aller. Era un home de carácter porque no ano 1923, no golpe de estado de Primo de Rivera, negouse a entregar o "seu" bastón de mando á autoridade militar, o que lle custou ser detido e levado á Coruña. A prensa quedou sorprendida de que no seu concello non houbese libros de actas nin de contas.
  Casou con Pilar Iglesias Rapela. Os Iglesias Rapela (eles escribíano "Rápela") eran unha familia de posición con casa en Deixebre. Unha das irmás casou co médico Antonio Concheiro Ródriguez, por tanto os Concheiro Iglesias eran curmáns dos Liñares Iglesias.
  Tiveron cinco fillos que compartían os mesmos apelidos que o pai: Carmen, Francisco, Juan, Teresa e Gumersinda Liñares Iglesias.
  Carmen, a filla maior, casou con Diego Ruíz, Teresa co médico de Cerceda Luis Rivas Marzoa e Gumersinda co administrador de correos de Cambre Antonio de Salvador Guzmán de Villoria y Palavicini (m. 1965 e soterrado en Ordes no panteón familiar).  
 O segundo irmán, Francisco, foi médico e casou en 1917 coa moza do Mesón, Concepción Ramos Insua -irmá de Celsa, a muller máis rica do lugar-, matrimonio que non tivo fillos.

  Pero o que máis nos interesa é Juan Liñares Iglesias (1885-1951) que foi xuíz municipal, empresario (xerente dos autobuses "El Noroeste" e da "Eléctrica de Órdenes"), banqueiro e, en 1930, alcalde do concello. Casou en 1906 con María Castro Bao (1887-1961) e tiveron 10 fillos: Gumersindo, Juan, Luis, Pilar, Olimpio, Julio, José, Manuel, Mª de los Ángeles e Ramón.
  Parece que foi el o que iniciou a tendencia de quitar o "ñ" do apelido para castelanizalo como "Linares" que lle parecía máis elegante.

  Gumersindo Liñares Castro foi o propietario do famoso "Bar Liñares", punto de reunión das familias VIP de Ordes na posguerra. Casou en 1935 cunha moza da boa sociedade madrileña, Valentina Martiáñez Bengochea, e un dos seus fillos foi o moi famoso bailarín Juanjo Linares (sen "ñ" coma o seu avó). Cando Gumersindo deixou o bar, pasou a mans do seu irmán Julio. A muller deste, Dolores Iglesias Moar, foi a inventora do popular "queique" de Ordes.

  Outro irmán, Manuel (1923-1999), foi propietario da droguería próxima ao cruce.

  O máis destacado foi Juan Liñares Castro (de mozo Juanitiño e tamén -por razóns obvias- O manco dos Liñares), avogado, que chegou a ser alcalde de Ordes nos anos 50. Casou con Ángela Stolle Ramos, filla de Pastor Stolle, xefe de telégrafos. Tiveron 10 fillos, dos cales poucos quedaron en Ordes: Mario que traballaba na Caixa de Aforros, Mª Jesús Liñares Stolle, propietaria da farmacia que había en Alfonso Senra 112 (agora, no outro lado da rúa, Nº 139, a propietaria xa é unha neta, Mª Gemma Rodríguez Liñares), Pituca, muller de Jorge Concheiro, e Gemma, de Mario Concheiro. O resto dos fillos espalláronse por diveros lugares como Coruña, Ferrol e mesmo Pola de Laviana en Asturias (Juan Pastor, tamén farmacéutico).

No hay comentarios:

Publicar un comentario