Empresas da comarca 2014

  Se ides á páxina de Economía Digital, podedes ver cales eran as 2500 empresas máis importantes de Galicia. A comarca de Ordes aportaba só 33 empresas a esa lista. Delas 11 eran de Oroso, 9 de Cerceda, 4 de Ordes, 3 de Mesía, 3 de Tordoia, 2 de Frades e 1 de Trazo.

  Se nos circunscribimos só ás 500 empresas máis importantes, a comarca aportaba 7, das cales 3 eran de Oroso, 2 de Ordes, 1 de Frades e 1 de Cerceda.

1ª) Tal como se podía esperar SOGAMA SA, a empresa de tratamento e eliminación de lixo nacida en 1992, era de lonxe a primeira da comarca. A súa facturación anual de 112,4 millóns de € máis que triplicaba á da segunda e os seus beneficios de 7,8 millóns case dobraban aos da seguinte.

2ª) INTERNACO SA, a veterana empresa ordense de comercio ao por maior de maquinaria naceu en 1976 pero a súa historia comezou en 1969 cando Manuel Concheiro García logrou a distribución nacional de Husqvarna. No 2014 cos seus 37,7 millóns de facturación era a primeira de Ordes e a segunda da comarca.

3ª) CRC OBRAS Y SERVICIOS SL, empresa de construción, naceu en 1940 da man de Ramón Carro Fernández. Logo, baixo a dirección do seu fillo, Ramón Carro Romero, converteuse nunha das máis importantes da comunidade e iniciou a expansión fóra de Galicia. No 2014 a pesar da crise do sector, aínda era a primeira da comarca en número de empregados e a terceira en facturación cuns 36,8 millóns de €.

4ª) PUENTES Y CALZADAS Grupo de Empresas SA, nacida en 1977 en Sigüeiro, está especializada na construción e reparación de estradas. Aínda que a súa facturación (32,4 millóns) era un pouco menor que CRC, gañaballe por goleada en beneficios (máis de 4 millóns fronte a 113.000 €).

5ª) Explotaciones Forestales SOUTO CARRILLO SL, empresa de Aiazo (Frades) nacida no ano 2000 que, como indica o seu nome, dedícase a actividades forestais (comercio de madeira, compraventa de fincas, etc). Cunha facturación de 31,3 millóns era a máis importante empresa do sector primario na comarca.

6ª) Estructuras y Montaje de PREFABRICADOS SA, é outra empresa que pertence ao Grupo Puentes. Nacida no 1995, está especializada na construción de pontes e túneles. A súa facturación era de 30,5 millóns.

7ª) LÁCTEOS MERZA SL, nacida en 1998 en Sigüeiro, é unha empresa que comercia ao por maior con produtos lácteos, ovos, aceites, etc. A súa facturación superaba por pouco os 25 millóns de euros.

  Do resto das empresas da comarca, só 3 superaban os 10 millóns de facturación: Carpintería Ramón García de Mesía, Gesuga de Cerceda e Viriato (agora pechada).
  Aquí tedes a lista completa. A facturación está expresada en millóns de € mentres os beneficios están en miles de euros.

Nº	EMPRESA	Fact.	Persoal	Benef.
60	Sogama	112.4	11 a 25	7.785	Cerceda
171	Internaco	37.7	51 a 100	1.331	Ordes
174	CRC	36.8	101 a 250	113	Ordes
202	Puentes y Calzadas	32.4	51 a 100	4.637	Oroso
214	Souto Carrillo	31.3	11 a 25	1.505	Frades
218	Prefabricados	30.5	51 a 100	1.663	Oroso
262	Lácteos Merza	25.6	1 a 5	32	Oroso
513	Ramón García	12.8	51 a 100	13	Mesía
539	GESUGA	12.1	51 a 100	3.200	Cerceda
564	Viriato	11.4	101 a 250	-331	Ordes
746	K Klima NO	8.2	26 a 50	97	Cerceda
776	Cerámica Verea	7.9	26 a 50	68	Mesía
812	Millasur	7.5	26 a 50	358	Oroso
816	Ríos Sangiao	7.5	51 a 100	109	Oroso
870	Indupanel	6.9	51 a 100	608	Cerceda
886	Cerceda SA	6.7	6 a 10	30	Cerceda
922	Armaduras SAU	6.4	6 a 10	37	Oroso
949	Coba de Vales Cop	6.2	6 a 10	12	Mesía
983	Torres Golán	5.9	26 a 50	215	Tordoia
985	Maq Agr. Cancela	5.9	26 a 50	74	Tordoia
994	Gefico Enterprise	5.9	26 a 50	-154	Cerceda
1046	Madeiras Castro	5.6	6 a 10	-9	Oroso
1149	Área Serv. Os Carballos	5.1	6 a 10	133	Oroso
1179	Almacenes Sanjurjo	4.9	6 a 10	237	Cerceda
1336	Almacenes Cancela	4.4	11 a 25	11	Tordoia
1489	Eulogio Viñal	4.0	26 a 50	2	Oroso
1597	Porto-Muiños	3.6	11 a 25	5	Cerceda
1721	Moto Garden	3.3	11 a 25	63	Oroso
1837	Transportes NO	3.1	11 a 25	60	Trazo
1994	Galopín Playgrounds	2.8	26 a 50	-176	Cerceda
2411	Ponpre	0,00	11 a 25	0	Ordes
2417	Obras y Viales	0,00	26 a 50	0	Oroso
2479	Central de Frades Cop.	0,00	11 a 25	0	Frades

 
  Se queredes buscar con facilidade empresas da comarca, podedes premer no seguinte enlace: ORDESECOMARCA.