Usos do solo na comarca

  Menos hortas e prados e máis eucaliptos. Esta é a tendencia que calquera pode observar desde hai anos na nosa comarca (na maioría de Galicia tamén) e que agora podemos constatar con cifras oficiais do IGE (Instituto Galego de Estatística) publicadas en novembro de 2016.

  Os espazos forestais ocupan xa unhas 38.300 hectáreas nos sete concellos da comarca que equivalen ao 50,7 % da superficie total. Nesta categoría inclúense, tanto os terreos arborizados con escasa intervención do home (o que popularmente se coñece como "a monte"), coma plantacións forestais perfectamente planificadas e coidadas.

  O espazo que ocupan os cultivos e praderías, xeralmente vinculados a explotacións agrarias e gandeiras, suma algo máis de 30.000 hectáreas, o que representa o 39,75 % da superficie total da comarca. É unha categoría en paulatino retroceso debido á crise de prezos do sector lácteo. Isto ocasionou o peche de moitas granxas e a conversión dos prados en montes que aportan máis beneficio a medio prazo.

  O terreo que se dedica a outros diversos usos non chega ás 7.230 hectáreas, o que supón un 9,6 % do total. 

  Con todo, se comparamos co conxunto de Galicia (65 % de uso forestal, 24 % de prados e cultivos e 11 % doutros usos), a comarca aínda non chega á superficie forestal promedio.

POR CONCELLOS

  Destaca o feito de que Mesía é o único concello que conserva máis superficie dedicada a cultivos e praderías que a uso forestal. O 46 % fronte ao 40 %, mentres outros usos supoñen o 14 %.

  No extremo oposto está Trazo onde o 59 % do seu territorio está plantado de árbores. Sen embargo, o seu 36,5 % dedicado a cultivos e prados non é o máis baixo da comarca. Isto corresponde a Cerceda cun 35 %. O segundo concello que máis terreo dedica a usos forestais é Frades con máis do 55 % do total.

  En canto a Ordes, as súas cifras son case iguais ao promedio comarcal. 48,8 % de superficie forestal, 40,5 % de prados e cultivos e 10,7 % de terreos con outros usos.