Peregrinación de 1954

   O sábado 11 de setembro de 1954 entrou pola mañá na catedral a peregrinación conxunta dos arciprestados de Berreo de Arriba e de Abaixo. A afluencia foi extraordinaria, calculándose o seu número en 3.500 peregrinos.

  O estandarte do grupo de mulleres do Arciprestado de Berreo de Arriba foi portado por dona Ángela Stolle Ramos (esposa do alcalde Juan Liñares), recollendo as cintas dona Clara Rivas de Astray e a señorita Piedad Carnota*. O dos homes foi portado por Alfonso de Navascués y de Pablos, xuíz de instrución, recollendo as cintas o notario de Ordes Alfonso Leirós Fernández e o rexistrador da propiedade tamén de Ordes Emilio Durán Corsanego.

  O estandarte dos homes do arciprestado de Berreo de Abaixo levouno o alcalde de Trazo.

  Participaron na comitiva os compoñentes dos concellos de ambos os dous arciprestados cos seus respectivos alcaldes, presidindo o de Trazo o primeiro tenente de alcalde. Tamén ían na presidencia os arciprestes señores D. Joaquín Andrade Orza e D. Jesús Sánchez Verdeal (párroco de Numide e Parada), coas representacións da Arquiconfraría do Apóstolo e Xunta do Ano Santo, o concelleiro santiagués, señor López de Riego, e o arcipreste do Xiro da Cidade, señor Louro.

  Antes da misa o arcipreste Andrade Orza, que fora profesor do Seminario Conciliar de Santiago, presentou a ofrenda ao Apóstolo recibida polo señor cardeal, dando lectura a unha magnífica invocación. O doutor Quiroga Palacios contestou á invocación cunha alocución na que felicitou aos peregrinos por render homenaxe ao santo Apóstolo, exhortándolles a manterse firmes nestas manifestacións católicas.

  Non faltou logo a habitual foto nas escaleiras da praza da Quintana.

  Os peregrinos animaron coa súa presenza as rúas compostelás e á tardiña iniciaron o regreso en tren ou autobús ás súas casas gratamente impresionados da xornada xacobea que viviron en Santiago.

 

 

* Piedad Carnota Soto, filla do procurador José Carnota (irmán do xornalista Vicente Carnota) e da mestra Juana Soto Menlle doña Juanita, era a presidenta da Congregación das Fillas de María e vivía onde agora están a xestoría Cristín e o Mira. Morrería só 7 meses despois, o 9 de abril de 1955.