Gala contra o cancro 2010

   O venres 30 de marzo de 2010 tivo lugar a 3ª Gala contra o Cancro (a 2ª en Ordes) organizada pola orquestra Panorama e o Concello. Unhas 25.000 persoas achegáronse á vila para contemplar un desfile de cantantes non tan nutrido como no megaconcerto do ano 2009 pero aínda así impresionante. O numero de asistentes estivo lonxe das 55.000 persoas que se esperaban pero o tempo tampouco xogou a favor.

  Isabel Pantoja era a indiscutible cabeza dun cartel, completado por Sergio Dalma, Soraya, Seguridad Social, Kate Ryan, Melocos, Tamara, Santa Fe, Juan Magán e de novo, repetindo, Carlos Baute. Lito, un dos cantantes da Panorama, declaraba que era unha oportunidade única porque Isabel Pantoja nunca cantara cunha orquestra que non fose a súa acompañándoa, aínda que a el facíalle máis ilusión a participación de Sergio Dalma.

  Con case unha hora de atraso, preto da medianoite deu comezo a gala, conducida por Carlos Baute e Soraya. O dúo foi o encargado de presentar aos doce artistas. A estrutura do concerto foi a misma que nas anteriores edicións: cada cantante interpretou dúas cancións, a primeira acompañada polos vocalistas da orquestra e logo outra en solitario pero co acompañamento musical de Panorama. Polo medio actuacións da orquestra que aproveitaba esta cita multitudinaria para presentar o seu último traballo "Dale al boom, boom". As ganancias da venda dos CDs (que custaban 10 €) e de camisetas (6 €) estaban destinadas á Asociación contra o Cancro. Lito explicou antes da gala que o primeiro ano entregaran 16.000 € e o anterior 22.000, cifra que confiaba en superar.

  Un dos triunfadores da noite sería Sergio Dalma, que foi recibido cunha das maiores ovacións. Comentou que viviu «unha noite galega» debido a que viña de cantar no García Barbón de Vigo. Destacaron tamén a presenza internacional da belga Kate Ryan e a do badalonés Juan Magán, quen informou que as imaxes da súa actuación serían usadas no vídeo promocional do seu último disco.

 

 

  Pero sen ningunha dúbida, a gran protagonista da noite era a tonadilleira Isabel Pantoja, artista que non se prodigaba en actuacións benéficas e menos sen os seus músicos propios. E non só non defraudou, senón que deixou a anécdota máis comentada porque sufriu unha aparatosa caída ao termo da súa actuación. Facendo un xiro, a súa longa saia xogoulle unha mala pasada e a cantante deu co seu corpo no chan. Isabel saíu airosa do suceso, primeiro coreando a "Salve rociera" aínda sentada no escenario, e despois tomándoo con humor -«No me digan que no me caí con arte». Foi atendida de inmediato no centro de saúde de Ordes e aínda que os médicos lle dixeron que se trataba dunha pequena escordadura sen maior importancia, ela insistiu en someterse a unha exploración exhaustiva, dado que nese mesmo pé sufrira outra lesión similar había poucos anos. Foi trasladada a Santiago, onde lle fixeron unhas placas no Hospital Clínico, co mesmo diagnóstico.

  E así, sen maiores incidentes, rematou a 3ª Gala contra o Cancro de Panorama.