Museo do Traxe

   O edificio que alberga o Museo do Traxe tivo dúas vidas, unha primeira como centro sanitario e a actual como centro cultural.

 

   Situado na rúa da Feira Nº 5, foi construído en tempos de bonanza económica, arredor de 1987, sendo a súa propietaria a Seguridade Social. Ocupa algo máis de 320 metros cadrados de superficie pero ao posuír tres plantas a superficie útil ven sendo de 686 metros cadrados. En 1990 foi traspasado ao Sergas e iniciou a súa vida como centro sanitario. Naquela época era xefe da Sanidade local o médico Manuel González Picón e traballaban nel os médicos de zona Manuel Barreiro e Jacobo Laya García, a doutora de APD María Bustillo, o pediatra Julio González Yebra, o practicante Rafael García Folgar e unha comadroa de APD.

 

  O seu tempo como centro sanitario non foi demasiado longo, pois pronto foi evidente que quedaba pequeno para tanta xente. Todos os que estivemos algunha vez nel recordamos o moito barullo que había habitualmente e que os mércores de feira aumentaba de intensidade ata niveis estratosféricos.

  En 1997 a Consellería de Sanidade tiña previsto instalar un PAC (punto de asistencia continuada) no centro médico xa que había medios pero non espazo. A finais de 1999 xa estaba construído o novo centro, quedando o edificio do campo da feira baleiro.

  Durante a alcaldía de Martino houbo intentos de buscarlle algunha utilidade pero finalmente o seu destino final sería converterse no principal museo da vila.

 

  No ano 2009, xa na primeira lexislatura do alcalde Regos, foi acondicionado para recibir a colección de traxes e outros obxectos (libros, crucifixos, complementos...) do bailarín, coreógrafo e estudoso ordense Juanjo Linares.

  Na planta baixa estaría o salón de actos, unha biblioteca con libros de danza doados por Juanjo, almacén e recepción. A primeira planta estaba dedicada á nai do bailarín, Valentina Martiáñez, e a segunda á súa primeira parella de baile en Ordes, Teresa Marcos. Dentro das vitrinas máis de 200 traxes do millar que compoñen a colección, un enorme catálogo a disposición do público.

  Infortunadamente Junjo sufriu un infarto e morreu en novembro en Madrid, sen poder ver o resultado final.

  A inauguración tivo lugar o sábado 16 de xaneiro de 2010. Ese día estiveron presentes o delegado do Goberno en Galicia, Antón Louro, o alcalde Manuel Regos, o director do museo e ex-alcalde Manuel Viqueira Verea Mundito, toda a corporación municipal, un representante da corporación de Puebla de Montalbán (Toledo), os irmáns de Juanjo, María Luisa e Gumersindo Liñares, diversos membros de grupos de danza e preto de 300 ordenses que non quixeron perder esta homenaxe póstuma.

  Na hora dos discursos todos ensalzaron a figura de Juanjo. Regos declarou que o pobo de Ordes pagaba así unha déveda co bailarín que levou o seu nome por España adiante. Mundito, pola súa banda, expresou o seu desexo de que o museo se convertira nun referente para os estudosos do folclore. A familia expresou o seu agradecemento.

 

  De todas formas o museo aínda tardaría uns días en abrir oficialmente as súas portas ao público. Iso ocorreu o 1 de febreiro de 2010.

  Tradicional guía do museo desde ese primeiro momento foi Mª del Carmen Regueira que lamenta o pouco coñecido que é dentro e fóra de Galicia.