Vértices xeodésicos

  Un vértice xeodésico é un punto sinalizado que indica unha posición xeográfica exacta conformando una rede de triangulación con outros vértices xeodésicos. Antigamente a exacta posición dos vértices servía para axudar a elaborar mapas topográficos a escala, tanto nacionais como rexionais.

  En España hai uns 11.000 vértices que están sinalizados por unha columna cilíndrica de 120 centímetros de altura e 30 de diámetro sustentada nunha base prismática de formigón de tamaño variable. Todo isto pintábase de cor branca e na España seca a cor aínda dura.

  Normalmente están en sitios altos e despexados desde os que se poden divisar outros puntos similares. Na nosa comarca pasaba así antigamente pero agora a maioría están ocultos polos eucaliptos e ningún conserva a cor branca, senón a gris do formigón. Sorte hai se se poden ver.

  Desde 1975 están protexidos pola Ley sobre Señales Geodésicas y Geofísicas, o que non os libras das pintadas feitas por algúns panocos.

 

 

  No concello de ORDES hai tres vértices xeodésicos. 

  O máis fácil de observar está na parroquia de Mercurín, a 428 metros de altura, no medio dun eucaliptal próximo á aldea de Guntín. Áchase no medio dun claro sen moitas árbores que obstaculicen a súa visión e está bastante limpo agás unha pequena zona con hedra.  

  No Mesón do Vento (Ardemil), está o punto de maior altura do concello (464 metros). Alí hai outro vértice xeodésico, totalmente envolto pola hedra, a carón dun depósito de abastecemento de auga. 

  Finalmente na parroquia de Vilamaior, no chamado Coto da Pena, preto da Pedreira  a 406 metros de altura e tamén no medio dun eucaliptal podemos atopar o terceiro vértice xeodésico, neste caso con moitas dificultades porque o bosque é mesto e ademais está cuberto de vexetación.

 

 

  Na COMARCA hai 12 vértices xeodésicos, aos que podemos engadir os de Facha (509 m) e Vilardoa (473 m), ambos os dous case na fronteira oeste de Trazo. De toda a comarca, o que está a maior altura é o de Cerceda e o máis espectacular o que está a carón da ermida de San Nicolao en Frades.

  Podedes localizalos neste MAPA.

 

VÉRTICES XEODÉSICOS DA COMARCA

Cerceda: Alto da Cerdeira (594 m)

Frades: Capela de San Nicolao (428 m)

Mesía: Rozamonte (461 m), Montouto (541) e Coto de Picoi (541)

Ordes: Guntín (428 m), Mesón (464) e A Pedreira (406)

Oroso: O Petón -Senra- (363 m)

Tordoia: Tenzas da Costa (530 m), Pedroso (399), Abelleiro (389)

Trazo: Medorra (423 m)