"El amor universal"

  Como dicía a popular canción de Aventura "Ya no es amor, es una obsesión ...".

  Os protagonistas, o cercedense José Cabeza Grela, máis coñecido como Pepe Mallo, que na súa mocidade chegou a xogar no filial do Deportivo e Mª del Sagrario Anunciación Dovale Ferreira, farmacéutica na Coruña.

  José coñeceu a Sagrario o día que se hospedou na pensión que rexentaban os pais dela, alá por 1975, e a primeira vista caeu rendidamente namorado. Quizá sexa conveniente engadir aquí que Sagrario era unha rapariga agradable pero de físico moi normal, metro setenta, forte complexión e pelo escuro e rizado.   

  Sagrario marchou a estudar a Compostela e Pepe perdeuna de vista pero un día descubriuna detrás do mostrador dunha botica, convertida en farmacéutica titular. Aí Pepe comezou a roldala, escribirlle cartas, seguila, chamala por teléfono e adquirir compulsivamente na botica remedios para os seus moitos e imaxinarios males. Aínda que ela nunca tivo con el máis conversacións que as típicas das transaccións comerciais, o amor de Pepe medrou día a día, tristemente non correspondido. Nin sequera desapareceu co casamento da súa amada. 

  Finalmente en 1987 decidiu publicar un libro coas moitas cartas que lle tiña enviado, a primeira de xaneiro de 1984: “Querida y apreciable sagrario; te escribo estas letras, esperando que al recibo de ellas te encuentres bien, en compañía de tu familia, deseándote un año próspero y feliz.”

  Alucinantemente logrou que o valente profesor Aller Bermúdez, prologara o libro manifestándose perplexo: “Ante lo hecho por el autor, que hoy presentamos, podríamos preguntarnos: ¿Es Cabeza un escritor?

  O libro, chamado "El amor universal", autoeditado polo autor (Que remedio!) acabou coa enorme paciencia de Sagrario, que respondeu cunha demanda ante o xulgado por lesión dos seus dereitos á honra e intimidade. O xuíz deulle a razón e ordenou o secuestro dos 500 exemplares. A literatura galega en castelán tardará en recuperarse desa dolorosa amputación.

  O suceso foi moi famoso a finais dos 80 e chegou á prensa nacional. Sagrario viviu unha fama non desexada compensada cun aumento da clientela na súa farmacia da Avenida de Arteixo.

  E Pepe? ... Atopou outro amor? Aparentemente si, porque en 1994 publicou outro libro epistolar, "Me confieso con Ana" -do que posúo un dos exemplares, con dedicatoria do autor- coas cartas que lle escribiu a unha tal Ana, sospeitosamente parecida a Sagrario.

   Como é o libro? Impagable. Só unha pequena mostra: "Mi amada Ana. Me alegró mucho conocerte y poder hablar contigo, me gustaste al verte y tuve que decírtelo; me gusta tu cuerpo, tus piernas, tu cara, tu pelo, tus ojos, tus labios, tus dientes y tu manera de hablar y andar".