Muíños do Cubo

  O rego do Cubo (que na maioría dos mapas aparece como rego do Cabo) é un dos afluentes do río Cabrón que discorre pola parroquia de Buscás. O último quilómetro ata a súa desembocadura ademais de ter fermosas paisaxes alberga un pequeno tesouro etnográfico porque hai ata tres muíños, iso si moi desigualmente conservados.

 

 

MUÍÑO de VILARIÑO

  Restaurado polos veciños, que converteron todo o lugar nun campo para celebrar merendas e festas, é unha pequena construción de 5 metros de lonxitude por uns 3,60 de anchura (16 metros cadrados de superficie). Está feito de cachotería e ten cuberta a unha auga con tella do país. Conserva o pousadoiro ao lado da porta, á que se accede por un par de chanzos. Actualmente apegado ao muíño hai un pequeno cubículo cadrado feito con madeira.

 

 

MUÍÑO do CUBO

  Áchase a poucos metros da chamada "Casa do Cubo". Ao contrario que o anterior, este está en moi mal estado co tellado case desaparecido. Dependendo da época do ano, pódese pasar a carón del sen decatarse da súa presenza pola gran cantidade de vexetación que o rodea. É un pouco máis grande que o de Vilariño, uns 5 por 4 metros aproximadamente. Está feito de cachotería, con algunhas pezas de gran tamaño. Destacan na parte baixa das esquinas algúns bloques moi grandes de seixo, que son fáciles de atopar nesta zona. O interior esta revocado e aínda conserva a pedra de moer.

 

 

A MAQUÍA

  Máis preto da estrada e a uns 70 metros do anterior muíño achamos unha complexa edificación (que foi medrando ao longo dos anos segundo as necesidades cambiantes dos propietarios) onde estaba a antiga maquía da familia Ruibal, motivo do topónimo deste núcleo. O muíño propiamente dito está englobado nunha construción máis ampla de cachotería miúda con tellado a dúas augas (actualmente con cuberta de fibrocemento), o mesmo que o edificio ao que está apegado, que conta con dúas alturas e que está destinado a diversos usos. Non quedan restos externos da canle nin nada que faga sospeitar que houbera esa maquía no século pasado, agás as testemuñas dos veciños.