O crime da Rúa Compostela

 

  Se en Ordes 2016 comezou con noticias divertidas como a etílica aventura de Manolo de Xaniño ou a saída ao mercado do colchón Smartress, a situación cambiou completamente en xullo cando apareceu un home morto en pleno centro da vila.

  A noite do sábado 16 ao domingo 17, aproximadamente ás 4.30, uns mozos que estaban de copas atoparon á entrada do aparcamento próximo á farmacia que hai na rúa Compostela o cadáver dun home que estaba sobre un gran charco de sangue debido a unha ferida de arma branca que lle segou a garganta, polo que todo apuntaba a que fose nese mesmo lugar onde se produciu o ataque que lle causou a morte.

  A vítima resultou ser Álvaro Paredes un dominicano de 24 anos residente en Alfonso Senra desde había uns anos e que volvera 5 días antes dunha viaxe ao seu país, acompañado da súa parella e unha filla de 2 anos de idade. Era bastante coñecido porque traballaba como porteiro en "La negra activa", un pub con apenas un ano de historia que había no campo da fería, moi popular entre toda a comunidade latina inmigrante pero que non tiña boa reputación porque se lle supoñía relacionado coa prostitución e o tráfico de drogas.

 

  Avisados os servizos de emerxencia, ao lugar acudiron patrullas da Policía Local e da Garda Civil, e posteriormente axentes da policía científica. Nun principio xa se pensou nun posible axuste de contas por tráfico de drogas e non se descartaba que o crime fose perpetrado por máis dunha persoa xa que Álvaro non mostraba sinais de terse defendido. Dado que nas inmediacións do consistorio producírase unha pelexa de madrugada os axentes tamén tomaron mostras das pequenas manchas de sangue que alí había, pensando que ese incidente podía estar relacionado co crime.

 Días despois o cadáver foi repatriado ao seu país e enterrado no cemiterio de Areoso, na cidade de San Francisco de Macorís. Bárbara Paredes Reinoso, a súa nai, foi a que pediu á embaixada o traslado do seu corpo. Declarou que o seu fillo tiña problemas de débedas con outras persoas, pero non sabía quen eran. En Ordes os seus amigos e familiares depositaron fotos, velas e flores no lugar do crime recordando a Álvaro.

 

  A investigación avanzou moi lentamente debido ao hermetismo dos ambientes nos que se movía a vítima. O caso complicouse aínda máis ao coincidir no tempo coa desaparición na Pobra de Diana Quer, o que obrigou a desdobrarse á brigada de Policía Xudicial do instituto armado na Coruña.

  Un par de anos despois do crime, púidose esclarecer a verdade. Grazas ao ADN achado descubriuse que o culpable era un colombiano chamado Julián Eduardo, que vivía en Santiago e que presuntamente vendía drogas a pequena escala. Así que o motivo era un dos que xa se supoñían: unha disputa polo territorio de venda, xa que a vítima tamén estaba implicada neste negocio.

  Julián Eduardo non tardou en estar considerado como o principal sospeitoso do crime. Despois de decenas de interrogatorios a persoas do círculo máis íntimo da vítima e a testemuñas presenciais da disputa que momentos antes do crime tivo lugar entre ambos os dous nun pub de Ordes era previsible que fose o criminal. Con todo, faltaba unha proba irrefutable. No corpo da vítima aparecía o ADN dun home, pero figuraba como descoñecido. A Garda Civil centrou entón os seus esforzos en lograr unha mostra xenética do sospeitoso para poder cotexala, Tras moitos esforzos, logrouna e o resultado foi o esperado: era de Julián Eduardo.

  Axudou a localizalo o feito de que este quedara cun dos dous teléfonos móbiles da vítima, o que permitiu seguir a súa pista de Santiago a Madrid e despois a Colombia.

  Con esa proba na man, ditaron unha orde de busca e captura contra o sospeitoso, que tras o crime fuxira a Colombia, país no que a Interpol e a policía colombiana localizárono na zona de Cali e detivérono en maio de 2018. Desde entón, estivo tramitándose a súa extradición a España, que finalmente foi concedida, o que permitiu que o sospeitoso comparecera nos xulgados de Ordes en maio de 2019 para ser interrogado por estes feitos.

 

 

  Quedou demostrado, aínda que el o negara, que esa noite baixou dun coche e por sorpresa, aproveitando o seu adestramento militar, atacou a Álvaro cun arma de 9 centímetros de lonxitude producíndolle unha ferida mortal no pescozo.

  O xuízo tivo lugar en outubro do ano 2020 (en plena pandemia de Coronavirus). O tribunal do xurado declarou culpable de asasinato ao acusado, Julián Eduardo V. T., para o que a Fiscalía solicitou unha pena de vinte anos de cárcere e indemnizacións económicas aos familiares. O fallo lido na sección primeira da Audiencia Provincial da Coruña resolveu con sete votos a favor da condena e só dous en contra. O xurado tamén acordou con esa mesma maioría de sete a dous votos que non procedía outorgar ao acusado nin a suspensión da condena nin solicitar o seu indulto debido á gravidade do delito cometido.

  Finalmente a sentenza da Audiencia Provincial da Coruña foi de quince anos de cárcere e unha indemnización de 265.000 euros en total a repartir entre a muller, a filla e a nai da vítima, alén de facerse cargo dos gastos que orixinou a repatriación do cadáver á República Dominicana e o enterro. Deses quince anos de prisión aos que foi condenado Julián Eduardo descontaríanlle o tempo que levaba en prisión preventiva, xa que ingresou no cárcere o 17 de maio do 2018 despois de ser detido en Colombia pola policía daquel país atendendo á orde internacional de busca e captura que emitiu a Interpol.