Pensións medias en 2017

  Os datos publicados polo IGE (Instituto Galego de Estatística) de 2017 constaban que a fenda entre as dúas galicias seguía a medrar polo menos nas pensións: a diferenza entre o que cobraba a xente das áreas metropolitanas e concellos máis industrializados co que cobraba o resto de Galicia incrementouse ata un 130 %.

 As Pontes mantíñanse un ano máis como o concello onde as pensións eran máis altas (1.333 euros de media). O último da lista era Avión en Ourense onde os pensionistas residentes (non se ten en conta os que vivían fóra) sobrevivían con 584 euros ao mes.

 

  Dos 313 concellos de Galicia só en 25 superaban os 1.000 € de media. Os primeiros da lista eran os que tiñan unha forte industria asociada como As Pontes, Fene (1.222) ou Cervo (1.175), e logo as áreas metropolitanas das cinco cidades do eixo atlántico. Lugo e Ourense non chegaban en cambio aos 1000 €.

  Na parte baixa da táboa estaban os concellos máis rurais. Había 3 zonas pobres: a parte leste da provincia da Coruña (Sta Comba, Tordoia, Vimianzo...), os concellos das montañas do centro-sur de Galicia, e moi especialmente o centro e sur de Ourense. Nesta provincia estaban 7 dos 10 concellos que pechaban a lista. Ademais de Avión, eran Quintela de Leirado, Padrenda, Baltar, O Irixo, Sarreaus e Ramirás.

  

  A comarca de Ordes cunhas pensións medias de 735 euros, estaba moi lonxe tanto do promedio de Galicia (que era de 898 €) como do moito máis alto da provincia da Coruña (case 928 €).

  Coma sempre, dentro da propia comarca había diferenza entre os tres concellos centrais e os 4 periféricos e máis rurais, pero neste caso moito máis matizada. Oroso era o único concello que superaba os 800 € mentres Ordes, Cerceda e Mesía pasaban dos 700 €.

  Frades e Trazo superaban os 650 € e destacaba negativamente Tordoia que, cos seus 621,53 €, tiña o triste honor de ser o oitavo máis baixo de Galicia e penúltimo da provincia da Coruña só superado negativamente (e por un céntimo!) polos 621,52 € de Santa Comba.